المهدي النفتي مول تصريح "الفضل فالرباح للاعبين والخسران المدرب مولاه".. واش سالات ساعتو فالوداد؟

صباح المهدي النفتي مدرب الوداد الرياضي كيواجه التهديد بالإقالة من تدريب الفريق الأحمر من بعدما عجز على قيادة الحمرا إلى نصف نهائي كأس العالم للأندية "المغرب 2022′′، وتقصات معه الواك من ربع النهائي مع الهلال السعودي فتيران المجمع الرياضي الأمير مولاي عبد الله، قدام الجمهور ديالها.
جماهير الوداد الرياضي وحتى لصباح اليوم، مازال ما استعوبتش الطريقة اللي تقصات بها الحمرا من الموندياليتو، خصوصا وأن الفريق كان متقدم فالنتيجة ديال الماتش إلى حدود اللحظات الأخيرة، قبل ما يجيب الهلال السعودي التعادل من بيلانتي ويتطرد الكابيتان يحيى جبران بسبب الإفراط فالاحتجاج على الحكم، ومن بعدها كانت الخسارة بضربات الترجيح والإقصاء مصير الوداد فالبطولة.
وكتحمل جماهير الوداد الرياضي المسؤولية الأكبر فالإقصاء للمدرب التونسي ديال الفريق المهدي النفتي، بسبب سوء تدبيرو للمواجهة والاختيارات التكتيكية اللي قام بها فالماتش، وكتلومو بزاف، بل الأكثر من هذا بدات كتدخل فمقارنة مستواه مع مستوى المدرب السابق وليد الركراكي وكتشوف على أنه جامي غيكون بحالو ويحقق ما حققه الركراكي مع الواك.
غضب جماهير الوداد وصل إلى حد المطالبة برحيل المدرب التونسي المهدي النفتي وهو اللي كان قال فواحد التصريح ل"كود" على أنه المسؤول على الاختيارات ديالو وأن "الفضل فالرباح كيرجع للاعبين والخسارة كيتحملها المدرب"، ودابا الوداديين شادينو من كلامو وكيطالبو سعيد الناصيري رئيس الوداد الرياضي بإنقاذ ما يمكن انقاذو وإقالة النفتي، فحسبهم الاستمرار معه كمدرب غيخرج الواك بدون ألقاب هاد الموسم.
المشجعين ديال الوداد دخل الشك بزاف فعلاقتهم بالمدرب المهدي النفتي اللي مازال ما قنعهم ملي جا، والحمرا معاه واخا كتربح ولكن بدون ما تقنع، هادشي من غير شي نتائج فالبطولة الاحترافية اللي كان خاص يربحهم الفريق الأحمر، ولكن كيعتبرو سوء تقديرها من المدرب المهدي النفتي كان وراء تضييع نقاطها وأنه دابا جا الوقت لتصحيح الوضع.