تحفظ كبير من منخرطي الرجاء وما زاعمينش يدخلو للمكتب ديال البدراوي واخا رشحهم

مازال ما توصلش عزيز البدراوي رئيس الرجاء الرياضي لحل باش يشكل المكتب المديري الجديد ديالو، من بعدما قرر يدخل معه منخرطين بالنادي باش يسيرو معه حيث عندهم دراية بشؤون الرجاء؛ وتأكد بلي كان غلط عندما بعدهم ملي طلع رئيس وجاب ناس من خارج النادي يسيرو معه وهاد الشي طيحو فهفوات تسييرية أثرت على الفريق.
وحسب مصدر مطلع، فالاجتماع اللي جمع البارح الأربعاء رئيس الرجاء الرياضي عزيز البدراوي بمنخرطين بارزين فالنادي ما خرج بحتى قرارات، حيث كاين تردد من جانب المنخرطين اللي عندهم تحفظ من عضوية المكتب المديري فعهد عزيز البدراوي، حيث ما باغيينش يتحسب عليهم أي فشل يوقع للفريق تحت رئاسة البدراوي خصوصا وأن الأخير مثير للجدل هو والقرارات التسييرية ديالو.
نفس المصدر، كشف أن عزيز البدراوي استعرض على المنخرطين خلال الاجتماع لائحة المرشحين لدخول المكتب المديري والمهام ديالهم وحاول يقنعهم باش يدخلو معه للتسيير بالمكتب، وهم طلبوا مهلة للتفكير وسط تحفظ منهم وقرروا يأجلوا الحسم فقرار الانضمام للمكتب المديري إلى اجتماع آخر فانتظار يتعلن على موعد له فالأيام المقبلة.