البدراوي مازال كيحاول يقنع منخرطين فالرجاء بدخول المكتب المديري وها فين وصلات المفاوضات

كيواصل عزيز البدراوي رئيس الرجاء الرياضي المحاولات باش يجمع مكتب مديري جديد للنادي كيستوفي الشروط والشرعية وكيحترم المكونات ديال الخضرا، من بعدما قفرها فالمرحلة السابقة ملي طلع رئيس وجاب شي وحدين عمرهم كانوا منخرطين ولا مسيرين وكاين فيهم اللي ما خلص حتى مبلغ الانخراط ملي دخل للمكتب، وهادشي تسبب فمشاكل للفريق منذ الصيف الماضي.
ومن بعدما دخل فمفاوضات مع عدد من المنخرطين البارزين فالرجاء واللي عندهم كلمتهم داخل النادي، باش يدخلهم معه للمكتب المديري فإطار التغييرات اللي كيدير باش ياخد الشرعية قدام برلمان الرجاء، من بعدما بعد المنخرطين فخطوة سابقة واعترف بأنه غلط فهادي، من المنتظر يعقد البدراوي وحسب مصادر مطلعة، اجتماع جديد وهو الثاني فأقل من يومين مع هاد المجموعة من المنخرطين فالنادي واللي حتى هم عندهم شروطهم مقابل أنهم يدخلو يسيرو معه وهادشي اللي كيخلي المفاوضات طويلة ما بينهم وبينو، وأن هاد المفاوضات كتمر بسرية تامة وتحفظ كبير من هاد المنخرطين.
المصادر نفسها، أكدت أن حتى حاجة ما تحسمت فالائحة المرشحة للدخول إلى المكتب المديري واللي كان كشف عليها "كود" فوقت سابق، وأن هاد اللائحة اللي فيها خالد فاكيرني وعبد الإله الإبراهيمي وخالد النقري ومصطفى دحنان وأسماء أخرى راه تقدر تكون هي وتقدر تغير بأسماء أخرى على حساب المفاوضات ما بين جميع الأطراف، خصوصا وأن المنخرطين ما باغيينش يكونو أعضاء بالمكتب المديري بالاسم والصفة فقط ويكونوا غطاء حماية للبدراوي قدام انتقادات برلمان الرجاء والجماهير ديالو الفريق، ولكن عندهم رغبة باش يشاركو فاتخاذ القرارات الحاسمة فتسيير النادي وهادي من بين شروطهم اللي كيركزو فيها على البدراوي أو أنهم يبقاو فمراكزهم كمنخرطين ويراقبو عمل المكتب المديري فحالهم فحال جميع الرجاويين.