#بالمغربية_تاعرابت: صندوق الحامض !

جابها لاصقة واحد المدون فالفيسبوك نهار السبت، وهو كيكتب "صندوق الحامض اللي دواو عليه المغاربة مع العصر زربات عليه التلفزة وعصراتو ليهم فالمغرب".
المدون دار الربط بين صندوق التفاح ولا الحامض (الله أعلم) اللي شغل الناس داك النهار وبين الحوامض اللي فرضات علينا تلفزتنا نشربوها مور المغرب دون مراعاة المعدة ديالنا الزغيبية.
النهار الأول الله يتبقي الستر، تلفزيونا زرب علينا، بحال يلا شادين فينا شي حسيفة قديمة: كاع اللي ماتيعرفش يضحك. كاع اللي سيدي ربي مثقل ليه الدم ديالو. كاع اللي حامض أوريجينال، وكاع اللي باسل شجاع فبسالتو كلفاتو تلفزتنا بمهمة وحدة محددة ومقدسة: يضحنا !!!
النتيجة شفنا الستاتية الزغيبية كتجري، فأغبى كاميرا غير خفية فالعالم بعد رائدة الغباء التلفزيوني فيفي عبده وفضيحتها هي وشي مغاربة فال « إم بي سي »، وشفنا ديك التريكة المطلوقة علينا اللي « تطلسات » بيها الوقت من
وليدات وبنيتات باقيين تيقولو بسم الله، وكلشي تنبأ ليهم بمستقبل مزيان يلا خدمو، ولكنهم زربو، وكلهم بغاو يوليو نجوم بتعواج الفم والوجه والهضرة، وشفنا أنه مايمكنش تضحك الناس ونتا ماقادرش تضحك راسك باختصار
دابا شنو الحل؟
كاين جوج ديال الحلول مالهومشي ثالث آعمو: الأول التيليكوماند، مغيرة المنكر ومبدلة القنوات، كليكي عليها وفرتاااااح وغادي ترتاااح، عيط جبد، أنفذ بجلدك وعقلك ووليداتك ياهذا من الغباء
الحل الثاني: التلفزيون شاد معانا العكس والضد؟ إذن نحاربوه بسلاحو. ياك حنا فين ماانتقدنا شي برنامج غبي، وقلنا عليه « غبي منو فيه » كيزيدو لداك البرنامج فالعمر، وكيقولو لينا « الللاآح »؟
إيوا آسيوي طاحت ولقيناها.
نديرو معاهم الكونطرير، ونبداو نشكرو فداك مهرجان المهابيل ديالهم: كاميرا خفية واعرة جايبة العز والمجد وكلشي. التخوفيش ماكاينش فالقنوات كلشي بمايرضي الله. المنتوج ديالنا الرمضاني هو الأفضل والأوعر والأشفخ والأبلخ والأقرن والأملح وكلشي وداكشي، وسير كمل مافيها والو.
آجي نجربوا هاد التويشية، ماعرفتي تقدر تصدق مع هاد وجوه العكس، ويهزوا علينا صندوقهم ديال الحامض ويهنيونا.
آش آوا قلتو؟ نجربوها؟ كنظنو « آن الأوان » خلاها حسن الفد اللي كيبقا نقطة التميز الوحيدة هاد العام من خلال عمل « طوندونس » اللي قدمو نهار الأحد اللي فات، واللي كيستحق تحية حقيقية على التميز ديالو عن "جوقة العميين" اللي غير كتخربق..