عداوي .. 11

-ديك النهار بغيت ع نسب واحد خينا، الساعة سويرتيه طالع لقا لساني مهرس أو ما كون شبعت فوالديه ع سبان ضوماج.
إو اللسان ما فيه عظم، عليها الصداع كاين فالدنيا، الدنيا إيه الدنيا، غدارة والوقت خايبة والفلك يدور والسوايع بدالة واللي بغاها الله هي اللي تكون. أو ما تمشي غير فين مشاك الله واللي مكتابة ليك تجيك تجيك، أو عا بلمهل كيتكال بودنجال أو اللي تخليك خليها أو الواحد يدخل سوق راسو أو ما دريش ما تخافش والله يخرج سربيسك على خير، واللي زربو ماتو واللولين ما خلاو اللخرين ما يكولو واللي بغى يربح العام طويل والواحد هو اللي يقضي حاجة راسو ودير راسك بين الريوس أو عيط أكطاع الروس واشفتو هاذ لا روس ديال المغاربة كدير. واش المريكان مكتاب عليهم يطلعو القمر ويسيطرو على العالم ويصنعو الصوارخ ويدخلو فالسياسة ديال الدول، ويصولو ويجولو.
واش الشينوه اللي دخلو تا لقاع الديور أو زربو علينا مالهم ماماتو واش الله اللي مشاهم تال درب عمر باش يصنعو لينا بلغة أو سجادة، شنهار ايدبحو لينا الحوالة نهار عيد الأضحى أو يختنونا ويعلمونا العربية وكفاش نصليو أو نحجو أولا شي شينوي إيولي موذن( الآدان بصوت صيني).
المهم ما عندنا عرض أنا ع داوي اللسان ما فيه عظم. Bon نحكي ليكم واحد الحكاية كتعلق باللسان اللي ما فيه عظم. كاين شي خطباء سواء فالجامع يوم الجمعة أو في البرلمان أو في الملتقيات والندوات كيتكلمو تقدر للخطيب ساعة وما يزيد أو هو يهضر يخطب زعمه أو ما يكول والو هاذ الخطباء كيجيوني بحال شي فرقة ديال كرة القدم رابحة بواحد أو خايفة تخسر أو تعادل أو كتبدا تعطل فالكورة وطيرها للتوش لربح الوقت هكاك كاين شي علما أو خطبا، أو نعطيكم مثال واحد الجمعة كالعادة توضيت أوقصدت الجامع صليت تحية المسجد جلست جا الخطيب تقام الأذان أو ناض صاحبنا أو بدا الخطبة بهدوء والكلمة بالكرام:
الحمد لله وحده والصلاة والسلام على رسول الله وعلى آله وصحبه خاتم الأنبياء والرسل أشرف المخلوقين محمد رسول الله صلى الله عليه وسلم. أدى الأمانة وبلغ الرسالة ونصح الأمة.
أما بعد، يا عباد الله أوصيكم ونفسي بتقوى الله فهي المنجية والمنقذة من عذاب الله وقانا الله وإياكم شر جهنم وشر الحساب والعقاب ومن نوقش الحساب عذب ونار جهنم تقول هل من مزيد وقانا الله وإياكم شرها وجعل خير أعمالنا خواتمنا. ولا تجعلنا من المحرومين يا رب بجاه المصطفى صلى الله عليه وسلم أشرف المخلوقين وسيد الخلق أجمعين. اللهم اغفر لنا ولوالدينا ولمن سبقنا بالإيمان. واللهم اجعل هذا الجمع مباركا ولا تحرمنا من فضلك ومن رحمتك ومن مغفرتك ومن جودك وكرمك.
أما بعد يا عباد الله كلكم من أدم وآدم من تراب.
يا سلام. أو شكون اللي كال ليك العكس آلفقيه، كال شي حد خلقنا من لانيمنيوم. وتا ادخل فالخطبة آلفقيه.
كلمة تابعة كلمة أو بشوي عليه ويقطع بالكحبة أو باقي ما ادخل باقي أورجوه..