شباب 20 فبراير بالناظور يدعون لمسيرة غدا الأحد باتجاه المستشفى الحسني

حركة 20 فبراير- الناضور -
غادي نخرجو نهاراللأحد 8 ماي في ساحة الشبيبة و غادي نديرو وقفة احتجاجية قدام السبيطار الحسني.
- حيت ماكاينش الدواء فالسبيطار.
- حيت قهرو المساكين بالرشوة.
- حيت الفقراء إلا مرضوا ومشاو لسبيطار كيبقاو مليوحين وكايرجعوا للدار كايموتو بالحريق.
- حيت ماكاينينش أطباء اختصاصيين اللي يداويو المرضى.
- حيت الريف ضربوه فأيام الاستعمار بالغازات السامة، هد الشي اللي خلا بزاف ديال الناس كيمرضو بالكونصير (السرطان) وما كاين حتى السبيطار اللي كيداوي هاد المرض الخطير فالمنطقة.
- حيت ماكيناش التغطية الصحية ديال كل المواطنين…
غادي نبقاو كانغوتو و كانحتجو:
- حيت كاينا الحكرة و الظلم فهاد لبلاد.
- حيت المعيشة غالية فهاد لبلاد.
- حيت الريحة ديال الفساد ولات عاطية بزاف فهاد لبلاد.
- حيت ماكيناش الخدمة فهاد لبلاد للي قاري و اللي ما قاريش، وحتى اللي خدامين كيعصروهم12 ساعة بجوج فرانك.
- حيت ماكاينش التعويض على الشوماج.
- حيت اللي كايغوت على حقو فهاد لبلاد كيقمعوه و كايعتقلوه بحال المعتقلين السياسيين و المعتقلين ديال 20 فبراير.
- حيت القضاء فيه الرشوة و المعرفة( باك صاحبي).
- حيت بغينا اللغة الأمازيغية ديالنا تكون رسمية فالدستور.
- حيت بغينا اللي يحكم يتحاسب و حتى واحد مايكون فوق القانون.
- حيت بغينا دستور ديموقراطي وديال الشعب.
- حيت كانبغيو الخير لهاد لبلاد وكلشي يعيش بالكرامة ديالو بلا مايحرك ويموت فالبحر…
حيت إلا هدرنا على حقنا غادي نجيبوه، غادي نخرجو كاملين نهار الأحد 8 ماي و نتلاقاو فساحة الشبيبة (قدام أولاد ميمون) مع الخمسة 5 ديال لعشية.