في هذا المقال سأحاول التعبير عن رأيي بالدارجة بعدما اكتشفت يوم أمس الخميس في دورة أكتوبر الإستثنائية لمجلس جماعة الناظور بأنني ملزم باش نبقى نكتب بالدارجة باش إفهموني الأعضاء ، حيتاش تأكدت من خلال مداخلاتهم ومستوى نقاشهم بأن ازيد من 95 بالمائة من أعضاء المجلس (مع كل احترامي وتقديري باللغة العربية الفصحى لبعضهم ولا يتعدى عددهم أصابع اليد الواحدة)، مكيفرقوش مابين مشروع مالية الجماعة وبين مزانية المارشي و بارادا ، وعرفت علاش مكيبغيوش بعض رؤساء المصالح الخارجية وباقي ممثلي الادارات إجيو احضرو دورات هاذ المجلس، وحتى اللي كيحضرو على غرار المواطنين كيدوزوا الجلسة حشمانين من المستوى الكارثي ديال الحلقة ولا اضحكوا عليهم، وعاد عرفت كذلك علاش عجلة التنمية واقفة فهاذ المدينة .وتأكدت بأن المشكل ليس في الرئيس حوليش ولكن في الفرق الممثلة في المصارعة عفوا في المجلس الجماعي. منين كنتكلم على المجلس راني مكنقصدش هادوك اللي كيهدرو ديما وكينشطوا لينا دورات المجلس في حضور حوليش ، ولكن كنقصد هاذوك اللي دارو مجموعة ديال التدخلات هذه المرة وكانوا غي كيعبرو وبزز باش كانو كيفهمو لي كيقولوه و حتى نقط جدول أعمال الدورة خصوصا نقطة المصادقة على المالية ومداخلة رئيس للجنة الميزانية بخصوص مالية 2020. إلى درجة أن عضو مبني للمجهول ” داراز بوفري” تعصب وخذا الميكرو ودار المشاركة ديالو وسمعنا صوتوا واخا هي المرة الثانية لي حضرها في اربع سنوات . وكاين شي أعضاء عمرنا سمعنا حسهم،تقول فيهم الساكتة المسكوت و مفاهمين حتى وزة في المالية، بغاو اناقشوا “تيزيتي” لي دار مجهود شخصي من باب المسؤولية واخا هو مارضيش على لي قدموا. لكن شي شخشيياط صعيب افرقوا بين (المهمة و القرار) ونعطي مثال باش تفهموني مزيان : الطبيب كيشوف المريض خاص ضروري ادير ليه العملية ولا اموت ..وهو معندوش الاطباء المساعدين و لي كيدير البنج و… الطبيب دار مجهود باش اوقف لمريض واخا نسبة نجاح العملية كانت ضعيفة. هذا حال مقدم مشروع الميزانية ،اجتهد حسب الامكانيات والمعلومات المتوفرة و لكن لم يقر بانه راض على ما قدم. نرجع عند شي قماقم حاولوا ابانو على أنهم مفاتيح سيدنا سليمان ، والمشكل مفاهمينش اشكاليات الادارة و اكراهات الموارد البشرية و صلاحيات الجماعة ،المهم انا متأكد عمرهم فتحوا كتيب القانون التنظيمي للجماعات المحلية . و الطامة الكبرى ظهور أعضاء لم نألفها بالمجلس بل حتى وكيل اللائحة ديالو هههه نساه. المهم شر البلية ما يضحك. والله يعطينا وجهكم وأنا أحبكم في الله لأنني متأكد بأنكم طيبون ،غير خصكوم شوية ديال الوعي السياسي و التربية على المواطنة وإحترام الأخر و المستوى العلمي و….. وبزاف لي خاص ولكن ماشي لكولشي،حيت كاين طاقات شبابية، متعلمة و مثقفة بغات تخدم ومجبراتش مع من وتوسخات للاسف مع الغاشي.
