الناظور...سلسلة " شاعر وقصيدة "إعداد وتقديم: ذة أمنة برواضي الحلقة ال 44 مع الشاعر " سعيد شافي "

إعداد وتقديم: ذة أمنة برواضي.
الهدف منها التعريف بشعراء مغاربة، وتسليط الضوء على مسيرتهم الإبداعية، وتقديم نموذج من شعرهم للقارئ.
الحلقة 44 مع الشاعر " سعيد شافي ".
شاعر القصيدة البدوية سعيد شافي
الولادة بمدينة وجدة
النسب قبيلة المهاية عرش اولاد عمران
شهادة البكالوريا شعبة صناعة الميكانيكية
أربعة لغات
الكتابة منذ 80 القرن الماضي
له ديوان ورد او شوك 2015
ودواوين قيد النشر
.... شاش الخاطر
وأكثر من 100قصيدة
القصيدة:
وين صدو وين
اتوحشت اوجوه صدو راحوا وين
شاش الخاطر ياالخو هاضوا لمحان
اتفكرت ارفاگتي مدة و اسنين
فوتناها زهو والخاطر فرحان
عيطة مالزياخ حاجب فوق العين
وين انصيب اجماعتي كي شاو ازمان
الرجلة والنيف و الميعاد الزين
وين اظهر لك بات ريح في لمان
خلاو التاريخ يذكرهم حيين
كي تحضر اجماعتي الگلسة تزيان
بعد الصحو ارياح هبت عنا حين
واظلامت بغيوم غطات كل امكان
تهلك بحري امواج وارياح اقويين
لمن نشكي ما احسن له حد اعوان
ابسل گاع امرار كان اگبيل بنين
عسل الشهد بار ولالي گطران
وبنادم كي الشمعة تضوي حين
والمرو اللي راح اجلو هدا حان
ما نكذبش انبوح ليكم صرت احزين
كي نفرح ساعة الباقي گاع امحان
الكرامة والكرم فيهم مجموعين
نجحوا بالاداب والصدق او ليمان
الرجلة اخلاق نعطيك اليقين
و الرجلة خصلات مولاها سلطان
الرجلة بارود م اللجعاب اينين
والرجلة صولات تظهر فالميدان
الرجلة أمانة او ثقة يا فطين
والرجلة كوراج أيات السجعان
الرجلة ماهيش تخراج العينين
ماهيشي قفزات لا خدع لا بهتان
ماهي بالصحة و لا افلان اخشين
اوماهيشي بالجاه و لا صولجان
الرجلة ماهيش بالحطة و الزين
او ماهيشي بالزوخ و لا ولد افلان
واش الأمي كي اللي قاري ستين
واش الطير الحر كي موكة سيان
الرجل محال يحگر المسكين
و الرجل محال يغبن النسوان
ماهيشي (خلطة ) و افعال الشينين
اولا هي بالكيف ولا كأس املان
الرجلة حين تصلح بين او بين
تبرد الشيعات و الصاعبة تليان
الرجلة حياء ثابت كن ارزين
الرجلة حكم ليها عز او شان
الرجلة حين ترضي الوالدين
تگلعهم مالضيم ما ايعيشوا لغبان
الرجلة كلمة او عاهد بين اثنين
ما يخدع و ايخون غي ناكر لحسان
الراجل معروف واجد ليك اعوين
فالحزة و الضيق وقت الصح ايبان
الرجلة محال تتمرمد فالطين
رجلة صور امتين مرصوص البنيان
الرجلة بالعطف و الطيبة و اللين
خاوة و التأويل أو طيب اللسان
الرجلة شرف سيف او ذو حدين
همة عز اقدر غالية فالثمان
هي عوض التاج فوق الرأس حصين
واش ايجيب احرير لخيوط الكتان
ماتبخس ماتحول مادامت لسنين
محال ابلا ساس يطلع البنيان
طلعت لجياح في هادو لسنين
طالگ بغلو ما احشم بين الفرسان
دخلوا للميدان من بيبان اخرين
و المشمت اضحاو فالصربة شيفان
يا ويح اللي طاح في قدرو مالعين
ماعندوش المال يا ضيمي ينهان
هدا وقت اشيان زير عل ليمين
واحرس مالجياح لا تقرى لمان
الباطل والحق ماشي مستويين
مول الصح ايفوز راجح فالميزان
يشكروك ادراهمك في كل حين
ويشكروك ادراهمك في كل امكان
ما باقي ميثاق ولا عهد امتين
ما باقي معقول صراحة نيشان
والرجل محال تغويه لملايين
ما يعرفش الخير من كابر جيعان
ولد النسبة عاد يخزر بالعينين
واش نگول اوباش نختم ذ الديوان
ما دوم الدنيا وين راحوا لخرين
وين راه النمرود قارون او هامان
كلمة حق انگول فالساعة والحين
كلمة حق انگول مانيشي جبان
كاتب ذو لبيات بهلو معروفين
ولد امهاية قح عرش بني عمران
سعيد شافي گال كي گالوا لخرين
فرغ جوفه يا الخو راهو قنطان
الف تحية ليكم مشكورين
ناسي و احبابي الصحبة والجيران
بالصلاة على خير المرسلين
محمد لمين الحبيب العدنان
نهداكم بالخير يا قرة العين
نتلاقاو ان شاء الله ساعة لمان