سلسلة شكون هو المجرم : الحلقة الرابعة

سلسلة شكون هو المجرم: الحلقة الرابعة
حل الحلقة الثالثة هو:
مايمكنش لعبد الله يعرف الطريقة باش ماتت مراتو الا الى كان هو للي دارها وحاس بالجريمة لأن حتي واحد ماعارفش الطريقة باش ماتت وخا هاكاك كانت أول كلمة طلعت من فمو مللي دخل للسبيطار هي شكون للي قتلها بالقرطاس؟
الحلقة الرابعة:
اتصل مدير لوزين د السيما بنواحي مراكش بلاجودان ديال الجدارمية كايخبرو بوقوع سرقة كبيرة من الخزنة ديال لوزين و قبل ما يقطع التيليفون نصح لاجودان المدير باش مايخلي حتى واحد ايقرب لمسرح الجريمة.وملي وصل لاجودان لقى كلشي فبلاصتو حتي حاجة ما مقيوساش الخزنة دلحديد من صنع ياباني محلولة وخاوية و عرف لا جودان بلي مايمكنش اتحل الا بيد شي واحد كايعرف الكود السري وحدا الخزنة لقى لاجودان واحد الساعة خاصة بضبط الوقت بلوزين طايحة على الارض وساكتة عند التسعود ديال الليل خداها لاجودان وخباها بلا مايشوفو حتى حد.
المدير خبر لاجودان بلي ثلاثة دلموظفين هوما للي كايعرفو الكود السري ديال الخزنة
الاول هو الكيسور للي كايتلقى العلاج فالسبيطار هاذى يومين بسبب صداع فظهرو وتبين لاجودان من خلال تحريات الشاف المساعد بلي الكيسور مريض وماخرجش من السبيطار من اليوم للي دخل ليه.
والموظف الثاني هو المساعد ديال الكيسور جابوه الجدارمية للتحقيق وقبل مايسولو لاجودان قال:انا أسيدي بريئ والدليل ديا لي هو الوقت للي وقعات فيه السرقة كنت عند واحد صاحبي وبقيت معاه من التسعود حتى للوحدة دلليل مشاو الجدارمية جابو صاحبو للتحقيق وقدام لا جودان قال بلي بالفعل كان عندو المساعد ديال الكيسور بالليل من التسعود حتى للوحدة.
والموظف الثالث هو الشاف كونطابل للي كايعرف الكود السري أول مادخل للابريكاد قالو لاجودان بلا تنكر اعترف بالجريمة ولكن الشاف كونطابل حلف بالله ونكر اي علاقة ليه بالسرقة وملي سولو لاجودان فين كان وقت السرقة جاوب بلي كان ناعس فدارو بوحدو ....
لاجودان ديال الجدارمية عرف المخار للي سرق الخزنة واعطى الامر للشاف المساعد باش يدير ليه المينوط
فنظرك شكون المخار للي سرق للخزنة دلوزين؟ وكيفاش عرف لاجودان؟