بوبا فكازا. حروب لمنع حفل فنان ومصدر من الجهة المنظمة ل"كود": ها شكون وراها وكلها تضليل وها علاش داروها وديك وثيقة المنع ما توصل بيها حد

حرب كبيرة نايضة على حفل غادي يديرو الراپور المعروف بوبا فكازا.
گاع الاسلحة الغبية توظفات فيه. بدات بالكذوب والسب وسالات بالفايك
حسب مصدر من الجهة المنظمة ل"كود" القصة بدات مللي تعلن على اسم الفنان بوبا
مصدر "كود" قال باللي ناضت حملة منظمة حقيرة كدافع على مصالح شخصية وكتوظف الوطن. المصدر عطى ل"كود" مثال "قالو باللي هاد الفنان عاير المغربيات. ماشي صحيح، هدر على روبي اللي تجبدات فقضية بيرلسكوني، ولكن هاد الشي كان ف2016 وكون بصاح عاير المغربيات ما غادياش تجيبو موازين عام من بعد ويحضر ليه 100 الف مغربي فحفلو
المصدر اكد ل"كود" باللي بوبا جا للمغرب اكثر من 10 مرات بعد ديك لوقيتة وباللي فشي مرة كان غادي للسينغال تصور مع الراية المغربية وشكر الملك
مصدر "كود" قال باللي المشكلة ماشي بوبا اللا. بل الحفل. كيفاش؟ "ناض هاد الشي باش يؤثر على ابيه اللي غادي مزيان. بدات دعوات المقاطعة واللي هي فالاصل حروب بين فنانة. الهدف هو يتلغى الحفل باش ينجح حفل اخر غادي يكون وراء بعد 3 ايام يديرو الفنان النينيو" يشرح مصدر "كود"
واكد المصدر ان المسرح اللي قالو غادي يتمنع فيه الحفل سبق وتنظمات فيه سهرات وباللي كان يتوقع يحضر 6 الاف حتى 7 الاف شخص
ولكن اللي مثير ان كود هدرات مع افراد من الجهة المنظمة للحفل وما نوصلوش للحد الان بوثيقة منسوبة لعامل انفا دادس كيخبر الشركة المنظمة بالغاء الحفل "ما توصل حتى شي واحد بهاديك الوثيقة. حنا كنوجدو حفلها واخا هاد الحملة عنيفة. حنا كنبيغو بلادها وكيحركنا هاد الحب، كنظو باللي الوثيقة مزورة. راه التصطية ايلى كانت بصاح. مغرب اليوم ماشي ديال وثيقة بحال هاديك. ايلى كانت راها شوهة كبيرة لبلادها داروها وحدين كيدافعو غير على مصالحهم الشخصية وشي وحدين باغيين يرجعوها للاور" يختم مصدر "كود"