الناصيري: الوداد قدم تنازلات لعموتة وأنا اعتذرت له على شيحاجة ما درتهاش ولكن فاجأني وما كانش فالمستوى

أكد سعيد الناصيري رئيس الوداد الرياضي أنه عمرو ما كان ضد الحسين عموتة، وأن التعاقد معه جا لتلبية رغبة مكونات النادي، وبلي الواك وهو كرئيس له قدم تنازلات للمدرب المذكور باش يرجع للفريق فتجربة ثانية جديدة بعد تجربة 2017، ولكن ما كانش فالمستوى.
وتحدث سعيد الناصيري خلال المرور ديال براديو "مارس" وقال: "الوداد الرياضي قدم تنازلات كثيرة للحسين عموتة باش يرجع للوداد الرياضي، وأنا شخصيا اعتذرت له على شي حاجة ما درتهاش وما عارفهاش غير باش يجي، وهذا الشي على قبل مكونات الواك".
وبخصوص ان عموتة ترك الوداد كتدرب ومشى لقطر يحلل ماتشات كوب ديموند 2022، اللي كان سبب الانفصال عليه فالتجربة الثانية له مع الفريق وضح سعيد الناصيري رئيس النادي وقال: "تفاجأت حيث عموتة عمرو علمني انه غيمشي لقطر وغيبرك تما، ومخلي الفريق كيتدرب مع المساعدين ديالو وهو ما كيجيش وما خبرنيش بصفتي رئيس الوداد حتى كنشوفو فالتلفزة بحالي بحال الناس".
وكمل سعيد الناصيري وقال: "كون مشى يومين أو أسبوع كان ممكن نصبرو ولكن القضية كتولي فيها 20 يوم، وخرج كيبرر بأنه كان مستدعى من طرف اللجنة المنظمة لكاس العالم، ولكن كان يخبرنا حنا ويقول لنا ها شكون غنكلف".
وعلق سعيد الناصيري على سؤال "كون خبرك عموتة بمدة 20 يوم كنت غتخليه؟" وقال: "ما يمكنش".
وشدد سعيد الناصيري: "التوجه العام ديال مكونات الوداد الرياضي كيقول على أن الثقة كاينة فالاطر الوطنية وراه وليد الركراكي مشى من عندنا، وهذا علاش بغينا نعوضوه بالحسين عموتة ولكن الأخير ما كانش فالمستوى".