كيفاش "انوي" كتشوف مغرب اليوم. طلعات هي اللي مولات داك لعجب. الصحافة عن هاد المقاولة ماشي مهمة والتفاهة د"الفرقة" هي البديل

هاديك التفاهة ديال "الفرقة" اللي كدوزها "دوزيم" سبونسوريزي من شركة "انوي" للاتصالات. هاد الشركة اللي ما قدوش مدراءها يطوروها وتولي منافسة ل"اورانج" و"اتصالات المغرب" فكرو هادوك المسيرين الاغبياء يمولو برنامج غبي.
دابا من خلال اش كتسبونسوريزي كيبان ليك اش من مغرب باغي. "انوي" من خلال دعم هاد البرنامج راها باغية مغرب الاغبياء. مغرب انتحال الصفة. مغرب رباعة المهرجين والمهرجات. مغرب ايلى لبستي تكشيطة وشي تخربيقة خضرا فيها النجمة راك زرعتي الوطنية عند لمغاربة.
ما عارفينش واش مدير الماركوتينك ديال دوزيم عادل الشكيري او الشقيري هو اللي باع هاد الكونسيبت البليد للشركة ومن بعد جابو ل"دوزيم" والكادو ديالو الظاهر هو يعرضو عليه لاستراليا باكيدج كامل٬ ولا هادوك مشاو عند "انوي". الاحتمال الاول هو اللي كاين.
نهار جا هاداك عبيد اللي من الفرقة وعندو شركة انتاج لهاد التخربيقة٬ ل"دوزيم"٬ سول على الشقيري وقال لشي حد باللي جايب للقناة "بريكول".
هاد البريكول المشفور فالكونسيبت ديالو وفكلشي من واحد كانت دارتو "ميدي 1 تيفي" فمونديال قطر. الحقوق ماشي مهمة فقناة عمومية.
المهم ان شركة الاتصالات "انوي" التابعة ل"المدى" ورات للمغاربة اش من فئة كتدعمها. سمحات لهاد التافهين يديرو خدمة ماشي خدمتهم باش يديرو حوارات ويسولو. دعمات ماديا هاد عينة باش تخلق "جيل الضباع" كيف كان قال السوسيولوگ المغربي الكبير الراحل محمد گسوس.
شركة فيها مدراء بهاد الغباء عندها معركة كبيرة كديرها. همها تعميم التفاهة والغباء. دعم هاد العينة من البرامج راه دعم لهاد السياسة.
الكارثة ان اللي كيشرف على هاد الشي كامل هو عز الدين المنتصر بالله المسؤول الاول ديال "انوي" اللي كان المدير السابق لوكالة تقنين الاتصالات. هاد المسؤول اللي دوز سنوات كموظف سامي تلات بيه ف"انوي" كيدعم التفاهة. غادي يكون فرحان بهاد النهاية التعيسة للكاريير ديالو