واش حس بالحكرة؟ حمد الله تمرد على الاتحاد السعودي بسبب بنزيما.. لبس تقاشر فيهم "9" ودخل يتريني عليهم

مازال الدولي المغربي عبد الرزاق حمد الله لاعب اتحاد جدة السعودي خالق البوز ملي غاب على ماتش الفريق ضد الهلال فربع نهائي كاس العرب، وبعدها الخسارة والإقصاء والمشكل اللي عندو مع النادي بتأكيد من المدرب ديالو نونو سانتو، اللي لمح أن النجم المغربي تمرد وكيهدد بأنه يمشي بحالو.
مؤخرا، كانت وسائل إعلام سعودية كشفت أن عبد الرزاق حمد الله وضع إدارة الاتحاد السعودي بين خيارين، إما يرجعو له الرقم 9 اللي كانو حيدوه له وعطاوه للنجم الفرنسي كريم بنزيما اللي تعاقدو معه مؤخرا، وانه يرجع يلعب البلانتيات اللي حتى هما كلفو بهم بنزيما، أو أنه يمشي بحالو من الفريق.
وكيبان بصح أن عبد الرزاق حمد الله ما عاجبوش الحال على قبل لبلان ديال الرقم 9 اللي حيدوه ليه اتحاد جدة، حيث فالحصة التدريبية الاخيرة للفريق شارك فالتداريب مع اللاعبين ولكن كان لابس تقاشر زرقين وهما لابسينهم كحلين، والاكثر من هذا كان فيهم الرقم 9، وبالمقابل فكريم بنزيما كان لابس تقاشر كحلين بحال باقي اللاعبين وفيهم الرقم 9.
سلوك عبد الرزاق حمد الله غيشوفوه بزاف من المتتبعين أنه جا كرد فعل حيث حس بالحكرة، وغيشوفوه آخرين أنه تمرد وقلة انضباط من اللاعب المغربي، ولكن واش الواقع دابا كيقول أن اتحاد جدة واحلين حيث ما حيليتهم لحمد الله والمطالب ديالو باش يبقى، وما حيلتهم أنهم يصيفطوه بحالو وينوض لهم الجمهور، بلاصتو بانت ملي غاب فأخر ماتش ضد الهلال، وكان كريم بنزيمة بحال الراس المقطوع فهجوم الفريق، وبعد الخسارة كلشي بدا كيسول على السبب الحقيقي لغياب اللاعب المغربي اللي كان مشكل ثنائي خطير مع النجم الفرنسي فليماتش الفايتين.