بونو: فرحان حيث جيت للسعودية.. باغي نكتب التاريخ مع الهلال اللي كنعرفو من أيام الوداد

عبر الدولي المغربي ياسين بونو على الفرحة ديالو حيث انتقل إلى الهلال السعودي خلال هذا الميركاتو الصيفي، جاي له من فريق إشبيلية الإسباني.
وتحدث ياسين بونو فحوار على الموقع الرسمي للهلال السعودي، وقال: "فرحان بزاف حيث جيت لفريق بحال الهلال فريق كبير وتاريخي كيلعب على الأدوار الطلائعية وأكبر فريق فأسيا، وبالنسبة ليا هذا تحدي جديد فمسيرتي الكروية وجيت بعقلية باش نكتب التاريخ مع الهلال".
وبخصوص اللاعبين الأوروبيين الكبار اللي كتجيب فيهم الفرق السعودية حاليا، علق ياسين بونو: "هذا الشي مزيان بالنسبة للكرة السعودية والعربية عموما وكنظن كاينين مواهب كبيرة فالدول العربية، والسعودية كتعطينا دابا فرصة باش نبينو هذا الشي".
وأكد ياسين بونو أنه جا الهلال السعودي باش يحقق الألقاب، وقال: "جماهير الهلال كتنتظر أشياء كبيرة، وبالنسبة ليا هذا الشي إيجابي حيث أحب التحديات، واحب نكون فمكان فيه انتظارات كبيرة وكنتمنى نكون فاحسن مستوى ونكتب التاريخ مع نادي الهلال".
وختم الكول المغربي، وقال: "كنعرف الهلال من قبل سنوات، كنت لعبت مع الوداد الرياضي ضد الهلال فدوري أبها وشفت القاعدة الجماهيرية اللي عندو وكنت عارف أن الماتش ما غيكونش ساهل حيث الهلال فريق قوي".