ميلونشون وصل لمراكش فزيارة تضامنية مع ضحايا الزلزال.. ها فين غايمشي موراها وغايتلاقا زعماء أحزاب سياسية ورئيس لجنة الصداقة البرلمانية المغربية الفرنسية فالرباط

وصل زعيم المعارضة الفرنسية جان لوك ميلينشون، إلى المغرب، مساء اليوم الأربعاء، إلى مدينة مراكش، وذلك في وقت تمر فيه العلاقات بين باريس والرباط بأزمة معقدة.
ميلونشو غايمشي للحوز يتضامن مع ضحايا الحوز، فزيارة انسانية ولكن بعمق "سياسي ودبلوماسي" خصوصا في ظل الأزمة الصامتة بين الرئيس الحالي مانويل ماكرون والمغرب.
ميلونشو جا للمغرب، بعد تلقيه دعوة من نبيل بنعبد الله زعيم التقدم والاشتراكية ورئيس مجموعة الصداقة المغربية الفرنسية بمجلس المستشارين محمد زيدوح.
وأكد مصدر "كود" أن ميلونشو غايدير زيارة لكازا غايدير فيها محاضرة، موراها غايمشي للرباط وغايتلاقا بنعبد الله أمين عام حزب التقدم والاشتراكية، ونزار بركة الأمين العام لحزب الاستقلال.
اضافة الى هادشي، غايكون حفل عشاء لملونشو بحضور مسؤولين وأصداقائه بالمغرب والناس لي بغاو للعلاقات بين الرباط وباريس تكون جديدة وفيها الاحترام المتبادل.
وفهاد السياق، لجنة الصداقة البرلمانية المغربية الفرنسية لي كيترأسها الاستقلالي زيدوح، لعبات دور كبير فهاد التقارب بين القوى الحية بفرنسا مع نظيراتها السياسية بالمغرب، رغم وجود ازمة دبلوماسية بين البلدين.
لجنة الصداقة موقفاتش خدمتها، تلاقات مسؤولين فرنسيين سابقا وأكدت ليهم بلي راه ميمكنش يكون شي تطوير للعلاقات بين رباط وباريس بلا مايكون احترام سيادة المغرب على الصحراء، والندية فالتعامل.