نايضة بين ريال مدريد والبارصا قبل الكلاسيكو وفلورينتينو بيريز قرر يقاطع الماتش وما يحضرش

رجعت الأجواء للتوتر بين ريال مدريد والبارصا وهاد الشي قبل ماتش الكلاسيكو بين الفريقين السبت الجاي فتيران الكامب نو فبرصيلون، ضمن منافسات بطولة إسبانيا، وقرر رئيس ريال مدريد فلورينتينو بيريز يقاطع الماتش وما يمشيش يحضرو فالتيران.
وحسب وسائل إعلام إسبانية من ريال مدريد، فرئيس النادي فلورنتينو بيريز قرر ما يحضرش الكلاسيكو ضد البارصا فالكامب نو، بسبب شي تغريدة على موقع "x"، كان دارها ميكيل كامبس وهذا نائب الناطق الرسمي ديال البارصا، على نجم ريال ريال مدريد فينيسيوس جونيو فآخر ماتش للفريق الملكي فدوري أبطال أوروبا اللي كان ضد سبورتينك براك البرتغالي الثلاثاء الماضي، وقال فيها بلي فينيسيوس خاصاه تصرفيقة بسبب طريقة الاحتفال ديالو، ومسحها من بعد.
جريدة as الإسبانية المقربة من ريال مدريد الإسبانية، كشفت أن فلورنتينو بيريز قرر ما يمشيش يحضر ماتش الكلاسيكو ضد البارصا، وغيمشي بلاصتو نائب الرئيس فرناندو تابياس، وأن الأمور بين ريال مدريد والبارصا كتزيد تتعقد وهذا الشي كيتراكم على المشكل اللي نايض بينهم بسبب قضية "نيكريرا" اللي متهم فيها البارصا برشوة الحكام، وبالمقابل كيتاهمو البارصاويين ريال مدريد بالضغط والتشويش لاستغلال هاد الملف والاستفادة منو.