وا السي بنكيران: واش بغيتي وهبي يعتذر حيت فكرك بالضبرة ديال لابلاج؟ راه العاااالم عاقل عليها. عافاك ما تنساش الثوابت الدستورية الفصل 19 المساواة الإقتصادية و الإجتماعية و السياسية بين الرجل و المرأة

سي بنكيران ولى هاد ليامات ما عندو حتى مضمون جديد كيدير غير "و سقطت الطائرة في البستان و كان البستان هو بستان مدونة الأسرة و كان وهبي يزرع الحريقة و الشوك(على إعتبار أن الشوك و الحريقة هما المساواة و حقوق المرأة) في بستان مدونة الأسرة" و زاد هاد ليامات كاع نويطة جديدة " و إستعان وهبي في مخطط زراعة الحريقة في البستان بأمينة بوعياش"
قال ليك أ سيادنا سي بنكيران في بيان لاجتماع عااااادي للأمانة العامة البيجيدي(مع البيجيدي كلشي كيخرجو عليه بيان سواء إجتماع عادي او إستثنائي أو حفلة أو مؤتمر أو مكالمة هاتفية مع الأقارب و الإخوان و الأخوات كلشي كلشي فيه بلاغات و بيانات) تدارس فيه مستجدات الساحة السياسية الإقليمية و الدولية و الوطنية و الأوضاع الإقتصادية و اللي واقع فغزة و اللي حاصل فالقوقاز و بعد المشاورات و المحادثات و التمحيص توصل إلى أنه في موضوع بستان مدونة الأسرة، وهبي المحامي الكبير اللي طيح السنان فالمحاكم ديال المغرب و رافع حتى شاب ليه الرأس و غايكون ركبو السكر من الكثرة التناقضات بين التشريع و القوانين و الدستور خصوصا في مسألة حقوق المرأة و الطفل و المساواة بين الجنسين(كيف ما شبنا كاملين من السكيزوفرينيا فالقانون) و أمينة بوعياش اللي حتى هي ما خلات حقها فمنظمة حقوق الإنسان و العمل الجمعاوي و المرافعات، كيشكك السي بنكيران فالقدرات ديالهم على التعامل مع إصلاحات مدونة الأسرة و ما فاهمينش سيدنا آش بغا يقول.
أودي الله يهديك علينا أ سي بنكيران راك ما ذكرتي حتى نقطة قالوها فموضوع المدونة ممكن تحسب ضضهم. السيد وزير العدل راه كيشتغل في إطار ما جاء في البلاغ الملكي و عاد بدا اللجان مع السي الداكي و السي عبد النبوي.
و ما زاد الطين بلة أن السي بنكيران كينبه و يأكد علينا أن أي تعديل لمدونة الأسرة يجب أن يبقى مقيدا بالثوابت الدستورية وفي مقدمتها الدين الإسلامي والهوية المغربية' بحال إلى المغاربة جاهم الزهايمر و نساو باللي كاين دستور فهاد لبلاد و فيه مفاهيم جديدة و فيه مبادئ حديثة...إلخ.
الدستور الذي باركتم و صادقتم عليه و هللتم و طبلتم له في 2011 أ سي بنكيران مع صعودكم للحكومة راه فيه ثوابت أخرى و من ضمنها سمو المواثيق الدولية... مثلا و فيه حظر التمييز في القوانين بين الجنسين..مثلا...و فيه ضمان المساواة الإقتصادية و الإجتماعية و السياسية بين المرأة و الرجل...مثلا
راه حتى حد ما قاليك أ سيدي بغينا نحيدو الدين الإسلامي و الهوية المغربية من مدونة الأسرة، حنا راه بغينا غير نطورو القوانين باش تواكب التطور السريع للمجتمع و بغينا المساواة الحقيقية بين الرجل و المرأة و بغينا شي إجتهادات من علماء الدين الله يجازيهم بخير كيفما حيدو القصاص و الحدود بفتاوي في السابق يجتاهدو و يطورو المفاهيم الدينية باش تصلح هاد مدونة الأسرة اللي لا تلائم العصر.
و ثانيا قلتي أ السي بنكيران "أن كل المقتضيات التشريعية المتعلقة بالأسرة يجب أن تتقيد بالشرط الدستوري القائم على ضمان وحدة الأسرة واستقرارها والمحافظة عليها" ما إختلف حد معاك، راه منع زواج القاصرات لن يضر الإستقرار الأسري في شيئ و منع التعدد الزوجات لن يضر الإستقرار الأسري في شيء بل على العكس، سيعزز من تلاحم الأسرة و المرأة والرجل غادي يكونو على مستوى من التكافؤ في الحقوق و الذي بدوره سيساهم في الإستقرار النفسي للزوجين و الأطفال(الراجل ملي كيتزوج على مرتو و كيكون جوج أسر، لا هادوك هانيين، لا الأخرين هانيين كلشي حاقد على الآخر و هذا هو الواقع اللي كيعرفوه كاع لمغاربة)
و أخيرا، راه المساواة الإقتصادية بين الرجل و المرأة كشرط دستوري حتى هو غادي يضمن الشرط الدستوري الآخر اللي هو وحدة الأسرة و إستقرارها و لن يضر الإستقرار في شيء، راه (على إعتبار أنه صرحتي سابقا على أن بيت الزوجية ديالك أ السيد الأمين العام هو ديال الزوجة ديالك وارتاه من الوالد ديالها، كون ورثات بدون تعصيب كون كاع ما تحتاج حضرتكم تمد يديك لصالير الدولة و تخلي المغرب كولو كينتقد فيك و كون درتي شي مقاولة انت و المدام و وفرتو إحتياجاتكم المادية بكل أريحية)