فيلم ديال الرسوم المتحركة داير بوم فميريكان.. تصدر لي كَيشي هاد الويكاند وحقق أرباح كبيرة

مكينش شي واحد من عشاق السينما فميريكان وكندا مكيهضرش على الفيلم الجديد ديال الرسوم المتحركة "ذي بوي أند ذي هيرون" The Boy and the Heron، لي هو آخر أعمال المخرج الياباني المشهور في مجال الرسوم المتحركة هاياو ميازاكي.
هاد الفليم الجديد جا هو اللول فلي كَيشي ديال التيكيات، وحقق نجاح كبير هاد الويكاند، والصالات دالسينما كانت عامرة كلها في العرض ديالو تما.
على حساب ماقالت الصحافة ف ميريكان، حقق هاد الفيلم ديال ميكيات أرباح كتقدر ب12.8 مليون دولار.
كيهضر الفيلم على واحد الدري عندو 11 عام، رحل مع باه من المدينة للعروبية بعدما ماتت مو ف واحد الحريق، وكيتعرف على واحد الطائر لي كيعرفو على الغابة وهنا كتبدا القصة.