مفتشية الميراوي فتحات أونكيط ف فضيحة جديدة ديال ENCG دسطات وها تفاصيلها

المدرسة الوطنية للتجارة والتسيير بسطات التابعة لجامعة الحسن الأول والمعروفة عند العامة بENCG، ولات بؤرة فساد بسباب اللهطة اللي كيعيشوها شي أساتذة لي كيحلبو ففلوس التكوين المستمر من نهار بدا.
الناس دارت ڤيلات وطوموبيلات فاخرة وكاين شي واحد منهم موضوع تقديم أمام النيابة العامة بسباب شيك عطاتو ليه طالبة فيه 30 ألف درهم.
هادي شي مللي تسربات لائحة فيها 5 أثرياء ديال المدرسة، ذاك الشي كيخلع وكيطرح علامات استفهام كثيرة وكتستدعي تدخل النيابة العامة باش تحقق فهاد الفلوس كاملة فين تتمشي لأنه ميمكنش هاد الأموال الطائلة تيستافدو منها هاد الناس مقابل سوايع قراية او مهمات وهمية مكيناش على أرض الواقع گاغ.
مصادر "گود" من داخل وزارة التعليم العالي والبحث العلمي والابتكار قالت إن ولد النعناع عندو هادي هوتة خلات المفتشية العامة اللي هو رئيسها تفتح تحقيق فهاد الشي بدات من الرباط وغادا تكمل في سطات مني تصيفط المفتشين ديالها لتما، واللي عارفين الطريق مزيان حينت شحال من مرة أونكيطاو فهاد المدرسة.
طبعا الفرقة الوطنية للشرطة القضائية بالدار البيضاء راه حتى هي كتأونكيطي فموضوع الأموال الطائلة وراها عاصرة على الرئيس الأسبق ديال جامعة الحسن الأول لي مخلوع ومرعود من هاد الفيلم حينت معارفوش باش غادي يسالي.