جوندارم سطات طيحو جوج عصابات مخربينها شفرة فحد سوالم

من بعد يومين على تفكيك 3عصابة إجرامية مختصة فالسرقة بالسلاح الأبيض، تمكن كموندو من الدرك الملكي كيشرف عليه القائد الجهوي ديال درك سطات، اليوم الثلاثاء، من توقيف جوج عصابات إجرامية فحد السوالم متخصصة فالسرقة والتهديد بالسلاح الأبيض والضرب والجرح واعتراض سبيل المارة وسلب أغراضهم. وأفراد هاد العصابتين مبحوث عليهم باكثر من 60 مذكرة بحث وطنية صادرة عن البوليس والجندارم .
وكترجع تفاصيل سقوط العصابة الأولى حينما تمكن الكموندو الدركي من توقيف زعيم العصابة الملقب ب"بوطوسة" بمنطقة دوار غلام التابعة لي جماعة وقيادة السوالم الطريفة صادرة فحقو مذكرات بحث وطنية من طرف الدرك الملكي فدار بوعزة والأمن الوطني البير الجديد ودرك سيدي رحال الشاطئ وطماريس ولي تم توقيفو في دارو رفقة الخليلة ديالو البالغة من العمر 15 سنة وهي حامل، بحيث تعرفو عليه الضحايا لي زرع فيهم الرعب ولي تعارف عند الجندارم بالشركاء ديالو .
أما العصابة الثانية لي طاحت حنا هي اليوم تتكون من 3 أشخاص او تزعمها الملقب ب"ليساسفة" ولي تم التوقيف ديالهم فدوار الخيايطة بعد محاصرتهم من طرف الساكنة في نفس الدوار لي كانو تعرضو فيه لي المارة وسلبو ليهم أغراضهم، تليفونات وفلوس،هاد العصابة لي طاحت كانت كتنفذ عمليات السرقة باستعمال السلاح الأبيض .
دبا راه العصابتين لي طاحو فالحملة التمشيطية لي عرفها إقليم برشيد توضعو تحت تدابير الحراسة النظرية بتعليمات من الوكيل العام ديال محكمة الاستئناف فسطات، والبحث جاري عن باقي المتورطين للي معاهم.