الطالبي العلمي راجع لرئاسة مجلس النواب بدون منافس: هادو المشاريع والقرارات لي كيتسناوه منها زلزال إداري فالمجلس وتنزيل مدونة الاخلاقيات وإبعاد البرلمانيين المتابعين فملفات الفساد المالي والاداري والاتجار بالمخدرات من المسؤوليات فتجديد الهياكل

راشيد الطالبي العلمي، الرئيس المنتهية ولايتو، راجع لرئاسة مجلس النواب، ولكن هاد المرة بدفتر تحملات فيه توجيهات صارمة للرفع من أداء المؤسسة التشريعية.
يوم الجمعة 12 أبريل الجاري، مجلس النواب غادي يعقد جلسة لانتخاب رئيسه وتجديد هياكله، طبقا للدستور ولنظامه الداخلي. لحد الساعة، لا وجود لمنافس قادر على مواجهة الرئيس المنتهية ولايتو راشيد الطالبي العلمي، القيادي فحزب رئيس الحكومة عزيز أخنوش.
كل المؤشرات تؤكد بللي الطالبي العلمي راجع لرئاسة مجلس النواب، وراجع هاد المرة بقوة باش ينفذ وبصرامة إصلاحات جوهرية غادية تمس عمل البرلمان فمجالات التشريع وتقييم السياسات العمومية والدبلوماسية البرلمانية ومدونة السلوك واخلاقيات العمل البرلماني.
وحسب مصادر من المؤسسة التشريعية، فأول ورش غادي يشرف عليه الطالبي العلمي مباشرة بعد إعادة انتخابه على رئاسة مجلس النواب هو إقرار مدونة السلوك وأخلاقيات العمل البرلماني تكون ملزمة قانونيا كما جاء ذلك فالتوجيه الواضح ديال الرسالة الملكية فاحتفال البرلمان بالذكرى 60 لتأسيسه.
بطبيعة الحال، هاد المدونة خاص يكون فيها تعاون بين رئاسة المجلس والفرق النيابية، وخاصة لإبعاد النواب للي عندهم متابعات فقضايا رائجة في المحاكم كتعلق بالفساد والرشوة وتجارة المخدارات والاتجار في البشر، من الترشح لمناصب المسؤولية في هياكل المجلس وأيضا العضوية في شعب وبعثات الدبلوماسية البرلمانية.
هاد الموضوع فيه توجيهات صارمة من أعلى مستوى ويبدو أن راشيد الطالبي العلمي عندو كارط بلانش باش يفرض هاد الإجراء.
أيضا، الطالبي العلمي غادي يعيد النظر في النظام الداخلي للمجلس، وأيضا في الهيكلة الإدارية للمؤسسة. وأول ما هو مطلوب منه، هو إجراء افتحاص مالي للسنتين ونصف للي كان فبها رئيس، وتفعيل لجنة افتحاص مالية المجلس. للتذكير، فراشيد الطالبي العلمي كان ف 2015 قدم طلب لمكتب المجلس باش يتدار افتحاص مالية مجلس النواب ل 5 سنوات فوقت الرؤساء السابقين عبد الواحد الراضي وكريم غلاب ومصطفى المنصوري.
فهاد الإطار، يبدو أن قرار إنهاء مهام الكاتب العام لمجلس النواب نجيب الخدي قد اتخذ، وخاصة أن المعني بالأمر تحال على التقاعد أربع سنين هادي، وأيضا لعدم قدرته على مواكبة الإصلاحات المطلوبة ومسؤوليته في ارتكاب أخطاء إدارية كان آخرها فضيحة عدم أداء أجور الموظفين في حينها.
فهاد السياق، كاين حديث عن تعيين كاتب عام جديد لمجلس النواب قبل الدخول البرلماني المقبل في أكتوبر، وأيضا تعيين مديرين عامين ورؤساء أقسام جداد وهيكلة إدارية جديدة.
وفمجال العلاقات الخارجية، راشيد الطالبي العلمي غادي ينفذ توجيهات صارمة فما يتعلق بالدبلوماسية البرلمانية. وكيروج فالأيام الاخيرة قيام مصالح مختصة بتحقيق حول شبهات سوء التدبير والتسيير فمجال السفريات للخارج فكلا المجلسين، مجلس النواب ومجلس المستشارين.
هاد الشي علاش الطالبي العلمي غادي يدير تغييرات فالشعب البرلمانية وفالبعثات ديال المجلس للخارج وللي غادية تكون بمعايير جديدة مبنية على الفعالية والنجاعة فتحقيق نتائج محددة، ماشي هاد الشي للي كاين دابا ديال السفريات والشوبينغ فدبي ونيويورك وجوهانسبورغ ولندن وباناما، وأيضا ديال برلمانيين كياخدو تعويضات كبيرة وكيرجعو لبلاد بلا مايكملو المهمات ديالهوم.
فمجال ديال التواصل، الرئيس الطالبي العلمي مطلوب منو يخرج ملف القناة البرلمانية للوجود. هاد المشروع سبق تدرس ويبدو أنه تعطا الضوء الأخضر باش يتنفذ فإطار إعادة هيكلة القطب الإعلامي العمومي.
فهاد الأوراش كلها كاين ورش صعيب ولحد الآن داير الشقيقة لراشيد الطالبي العلمي فراسو: هو التنسيق بين مجلس النواب ومجلس المستشارين.
فهادي، وحسب مصدر مطلع من الأغلبية الحكومية، الأمور غادية تغير فالدخول المقبل وخاصة مع التغييرات للي غادية توقع أيضآ فمجلس المستشارين للي غادي بدورو يجدد الهياكل ديالو.