سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
رضا بناني تفرگع على جامعة التنس: حگرتوني وشككتو فوطنيتي راه التمويل والمشاركات كيجيوني من برا ونتوما ما كدعمونيش.. بعدومني وخليوني نلعب على درابو المغرب
أكد الموهبة المغربية فالتنس رضا بناني اللي وصل للمركز 15 عالميا لأقل من 18 عام، أنه كيتعرض للظلم من طرف الادارة التقنية ديال الجامعة الملكية المغربية لكرة المضرب، وأن الدعوة اللي ما رسلوش له للمشاركة فجائزة الحسن الثاني للتنس، هي غير حاجة من بزاف ديال الحوايج اللي دارو له، وأنهم حاگرينو ورد على المدير التقني خالد عفيف، وأكد أنهم كيشوهو السمعة ديالو بالتشكيك فالوطنية ديالو، وهذا عكس الواقع حيث ملي بدا كيلعب التنس وهو كيلعب فگاع البطولة بإسم المغرب وكيهز الدرابو المغربي ملي كيربح، ووضح ان الجامعة ما كتعاونوش ماديا وبلي كجيه الدعم من الاتحاد الدولي ومن شركات أجنبية، وخرج رضا بناني فأنستغرام ديالو ودار فيديو كشف فيه للجمهور المغربي اللي استغرب علاش ما شاركش فجائزة الحسن الثاني للتنس اللي بدات مدة هادي فمراكش، وقال: "كنشكر بزاف گاع الناس اللي تعاطفو معيا حيث تحرمت من بطاقة الدعوة للمشاركة فجائزة الحسن الثاني، وكنقول لكم أن هاد الحكرة اللي شفتو دابا هي اللي عايشها يوميا من طرف هاد الادارة التقنية وملي كانت عندي 10 سنين". ووضح رضا بناني: "حاولو يوسخو السمعة ديالي بجميع الطرق ويشككو حتى فالوطنية ديالي، وأنا الحلم ديالي كلاعب مغربي هو نمثل ونهز راية بلادي فأحسن البطولات العالمية وداكشي علاش كنتريني يوميا 6 السوايع ملي كنت صغير وحتى لدابا وكندير بزاف ديال التضحيات، ولكن باش نوصل للحلم ديالي بزاف ديال لحوايج خاصيني، وأولا خاصني التمويل حيث واخا أنا 100% مغربي وساكن وعايش فالمغرب وكنتريتي فالمغرب والصطاف ديالي 100% مغربي، عمرني ما خديت حتى مساعدة من الجامعة الملكية المغربية للتنس، والدعم كناخدو من الاتحاد الدولي للتنس ومن السبونسورا ديالي اللي هما شركة ديال فيدرر، ومن أكبر أجونس ديال اللاعبين فالعالم، ودابا تخايلو معيا وواش جاتكم نورمال ان شركات من برا والاتحاد الدولي للتنس كيساندوني، وهنا الادارة التقنية ديال الجامعة كدير كلشي باش تهمشني، وما كاينش لاعب فالعالم لاعب فالمستوى ديالي او قل مني ما كياخودش دعم مادي من الجامعة ديالو". وكمل بناني: "وثانيا التشجيع وغندوي دابا على بطائق الدعوة، وخديت كثر من 10 بطائق الدعوة فالسنوات الأخيرة من برًا منهم وحدة من بطولة مدريد الإسبانية، وتخايلو معيا خديت هاد البطاقة من إسبانيا، وهنا فبلادي الادارة التقنية الوطنية كتدير اي حاجة باش تحيد ليا بطائق الدعوة، وفبطولة اكادير رئيس النادي والكلوب عطاوني بطاقة الدعوة باش نشارك وجات الادارة التقنية وحيداتها ليا بدون سبب، وباقي احد الان ما عارفش علاش، وگاع اللاعبين اللي فالمستوى ديالي وكيلعبو معيا ما يمكنش تدور بطولة فبلادهم بلا ما ياخدو فيها بطاقة الدعوة ويشاركو فيها". ورد رضا بناني على المدير التقني للجامعة الملكي المغربية للتنس خالد عفيف، وعلى داكشي اللي قال عليه، وجاوب بناني: "باش نرجع لداكشي اللي قال المدرب التقني بأنني ما كنبغيش نلعب مع المنتخب الوطني وما كنبغيش نشارك فالبطولات معهم، راه عيطو ليا العام اللي فات باش نلعب فبطولة إفريقيا لاقل من 18 عام، ومشيت شاركت وربحت اللقب، ودارت شهرين ونص من بعد جاو عيطو ليا باش نلعب فبطولة افريقيا ناقص 16 عام، وما كانش يمكن ليا نمشي نشارك فيها حيث فنفس الوقت كنت مشارك فبطولة المحترفين ماسترز 1000 ديال مدريد، ومن بعدها جات اقصائيات كوب ديفيس واقصائيات بطولة افريقيا اقل من 18 عام، وما عيطوش ليا فحتى واحدة منهم وبسبب هذا الشي مشات ليا 200 نقطة وهبطت فالترتيب". وزاد رضا بناني: "وثالثا تشويه السمعة ديالي بجميع الطرق وما خلاو ما قالو فيا ولكن الحاجة اللي ضراتني بزاف هي شككو فالوطنية ديالي وهذا الشي ما يتقبلو حتى شي مغربي، وانا دابا باغي نسولكم اشنو كيعني مسؤول فالجامعة كيفما بغات تكون هاد الجامعة خارج كيدوي وكيطعن فالروح الوطنية ديال لاعب عندو 17 عام، أشنو باغي يوصل لنا وشنو كيقصد بهادشي ؟". وأكد رضا بناني اللي بزاف من المتتبعين المغاربة كيتسناوه يكون بطل مغربي كبير فالتنس العالمي، وقال: "البطولات اللي لعبت واللي ربحتهم راهم بإسم المغرب وهزيت فيهم راية بلادي ملي كانت عندي 10 سنين، وأنا أول لاعب مغربي ومن 30 عام هادي اللي ربح بطولة G300 وعمر الجامعة ما دوات عليها، وأول لاعب مغربي كيدخل للطوب 15 عالميا بعد كثر من 25 عام هادي، وهاد الحگرة اللي كنعيشها يوميا اثرت نفسيا عليا وسلبيا على النتائج ديالي، وانا دابا باغي نركز غير على التنس ديالي وكنطلب من هاد الناس يخليوني نخدم وما يبقاوش يخرجو عليا شي هضرة ما كايناش باش نقدر نحقق الحلم ديالي اللي هو نكون رقم واحد عالميا فالجينيور ونمثل بلادي أحسن تمثيل وديما المغرب".