حكيمي و PSG دارو ريمونتاد على يامال والبارصا وتأهلو لدومي فينال شومبيونزليگ

دارو باريس سان جرمان الفرنسي فريق النجم المغربي أشرف حكيمي ريمونتاد على البارصا فتيرانها فالصبليون، وربحوها فروتور ربع نهائي دوري أبطال أوروبا وتأهلو للدومي فينال.
وقدرو باريس سان جرمان يعوضو خسارة ماتش الألي ففرنسا مع البارصا بنتيجة 3 لجوج، وربحوهم اليوم الثلاثاء فماتش الروتور فبرشلونة بنتيجة 4 لواحد، مع العلم أن حكيمي وصحابو كانوا خاسرين مع لامين يامال وصحابو بواحد لزيرو ماركاه لهم رافينيا بعدما عطاه يامال أسيست واعر.
واستغلو باريس سان جرمان طرد الأورگوياني رونالد أراخو فالشوط الأول وخروج لامين يامال شونجمون باش البارصاويين يعمرو الدفاع ديالهم، وضربو 4 البيوتا ماركاهم عثمان ديمبيلي، وفيتينيا، وكيليان مبابي ماركا 2 بيوتا، وتأهلو بمجموع ماتشات الألي والروتور 5 ل4.
وبهذا الرباح تأهلو باريس سان جرمان لدومي فينال دوري أبطال أوروبا، وغيلعبو مع ضد بروسيا دورتموند الألمانيين اللي تأهلو بعدما ربحو بنتيجة 4 لجوج أتليتيكو مدريد الصبليونيين، اللي تقصاو هما والبارصا من ربع نهائي شومبيونزليگ.