ها امتى غيحكم الكاف فحادث ماتش بركان و USMA والعقوبة كتسنا الفريق الجزائري بسبب تعنت الكابرانات

من المرتقب يصدر الاتحاد الأفريقي لكرة القدم القرار ديالو بخصوص واقعة ماتش ذهاب دومي فينال كاس الكونفدرالية الإفريقية، بين النهضة البركانية واتحاد العاصمة الجزائري، وحجز السلطات الجزائرية لتونيات الفريق المغربي فخرق سافر لقانون الكاف، فهاد اليومين وقبل ماتش الروتور اللي غيتلعب بين الفريقين الويكاند الجاي فالمغرب.
وحسب المعلومات اللي توصل بها "گود"، فاللجان القانونية المختصة فالاتحاد الإفريقي اللي تحال عليها ملف ماتش نهضة بركان واتحاد العاصمة الجزائري، فتصدر قرارها والحكم فحادث الغاء المباراة بين الفريقين فالساعات الجاية، وعلى أبعاد تقدير وسط السيمانة يوم الاربعاء او الخميس.
وكتشير المعلومات إلى ان حكم الاتحاد الأفريقي غيكون لمصلحة نهضة بركان، حيث الفريق طبق القانون فالواقعة وتوصيات الكاف وهي انه ما يلعبش الماتش ضد اتحاد العاصمة إلا بالتونيات الدوريجين ديالو اللي فيهم خريطة المغرب، وهما التونيات اللي مصادق عليهم ومعتمدين من طرف الكاف، وحجزت عليهم السلطات الجزائرية فالمطار، مع العلم ان الكاف كان علم ب24 ساعة قبل الماتش الاتحاد الجزائري لكرة القدم واتحاد العاصمة ان سلطات بلادهم إذا ما رجعتش التونيات لنهضة بركان فالفريق الجزائري فيخسر الماتش امام الفريق المغربي بنتيجة 3 لزيرو.
ومبرمج ماتش روتور دومي فينال كاس الكونفدرالية الأفريقية، بين نهضة بركان واتحاد العاصمة الجزائري يوم الاحد الجاي فتيران بركان مع 8 الليل.