ها كيفاش تجبد أخنوش والكتاني ووزيرات مغربيات فسكاندال جديد ضد بيگونيا گوميز مرات سانشيث وها علاش خاص الدولة المغربية تجر الجهات اللي ورا هاذ الشي للقضاء

karim.elsoufi29@gmail.com
من جديد انتشر سكاندال مزعوم ضد بيگونيا گوميز مرات سانشيث. هاذ المرة تجبد أخنوش والكتاني محمد الرئيس المدير العام للتجاري وفا بنك، ووزيرات مغربيات، لكن منصة مالتيدا المتخصصة ف كشف الفايك نيوز ف الصحافة الإسبانية، فرشات هاذ المؤامرة الجديدة ضد المغرب وحليفه الإسباني. واللي خاص الدولة المغربية تجر الجهات اللي وراها للقضاء..
المنصة الإسبانية دارت تحقيق على هاذ الكذوب وتبين أن القضية وما فيها هي محادثات مفرغة ف ملفات ورد (word) عن ميساجات صوتية ومكتوبة وهمية حول مؤامرة فساد بين بيگونيا گوميز وأعضاء في الحكومة المغربية، وأن هاذ المسرحية كاملة من تأليف 2 ديال المحتالين.
ويتعلق الأمر بكل من ألبرتو روييلا وخوان مارتينيز گراثا، اللي سبق ليهم ترويج ملف روييلا بمعلومات مضللة، وهو عبارة عن نظرية المؤامرة تتهم مجموعة من السياسيين والمسؤولين القضائيين بالتورط ف مؤامرة إجرامية وشبكات فساد كبيرة داخل إسبانيا..
وحسب المنصة الإسبانية، كان الهدف من هاذ المؤامرة اللي حاولات تورط بيگونيا گوميز مع الكتاني (مصرفي مغربي)، وكذلك مع رئيس الوزراء أخنوش والعديد من الوزراء المغاربة، هو استهداف رئيس الحكومة الإسبانية، بيدرو سانشيث، اللي عاد خرج من أزمة.
وأضافت مالتيدا، انه ماكينش دليل رسمي على وجود مثل هاذ المحادثات والتسجيلات الصوتية المزعومة اللي تكلمو عليها ألبرتو روييلا وخوان مارتينيز گراثا ونشروها عبر موقع اليوتيوب. هاذ 2 ديال الأشخاص سبق وتحالو على السجن المؤقت دون كفالة ف 28 يونيو 2023، وتحقق معاهم من أجل الاحتيال المشدد، والاختلاس، والارتباط غير المشروع بمجموعة الإجرامية، لكن تطلق سراحهم بشكل مؤقت.
وجا ف المحادثات المزعومة مع المسؤولين المغاربة، ان بيگونيا گوميز صرحات ف عدة مناسبات، بأن ظهور حسابها البنكي في جزر البهاماس وغيرها من المعلومات غادي يشكل ليها قلق، هذاك الشي علاش اختارت أسماء مقربين منها باش ما تكونش ف الواجهة وجعل الأمر أكثر صعوبة ف اتهامها هي وبيدرو سانشيث.
وتم نشر هاذ المحتوى ف 17 أبريل 2024، من طرف خوان مارتينيز گراثا وألبرتو روييلا على قناة على اليوتيوب. ويتعلق الأمر بمقطع فيديو المدة ديالو 16 دقيقة وكيزعمو فيه أنهم تمكنو من الوصول إلى التسجيلات وقاموا بنسخها وتفريغها نصيا. كما سبق لهما اتهام وزير الداخلية فرناندو گراندي مارلاسكا وزوجته بامتلاك حسابات ف الملاذات الضريبية.
وهاذ ماشي هي المرة الأولى اللي كيواجه فيها ألبرتو روييلا مشاكل مع العدالة. ف عام 1999، نشرات صحيفة الباييس تصديق المحكمة العليا على حكم بالسجن لمدة عامين على روييلا بتهمة تزوير وثيقة خاصة. وف عام 2003، تحكم عليه بالسجن لمدة 18 شهرا ضده بتهمة تقديم شكاوى كاذبة ضد القضاة والمدعين العامين.
الأكيد ان هاذ المحتالين غير أداة ف يد جهات معلومة كتخدم أجندات معادية لتوجهات المملكة والاختراقات الدبلوماسية المهمة ديالها، والقضية كبر من 2 ديال الأشخاص مولفين على فبركة الاتهامات للحكومة والأشخاص، خاصة إذا توضعات ف سياق التحريض والاستهداف لكل ما هو مغربي واللي تزادت الوتيرة ديالو منذ تطبيع العلاقات مع تل أبيب واعتراف أمريكا وإسبانيا بمغربية الصحراء. وهاذ الشي علاش خاص الدولة المغربية تجر الجهات اللي ورا هاذ الشي للقضاء..