سقراط لمحمد السادس: سيدنا الله ينصرك عطيني قفتي واخا ما كنصومش، هما جعلو مني أحد الأصوات الحرة التي أخرسها المخزن زعما وأنا مجرد صوت بياع وشراي كيغوت

انا الموقع أسفله، محمد سقراط، موغرابي الجنسية، المغرر به سابقا في ساحة النضال والمبادئ والبحث عن الكرامة في الجموع العامة لعشرين فبراير، الذي جعلت منه جيمات المناضلين معارضا شرسا للنظام وأنتيمخزن كما يقول مناضلوا الدلافين، بقاو كينفخو ليا فالبعرة حتى بيعوني لعجل ودبرت على عام ونص ديال الحبس، كنت أظن أن الجيمات تصنع الرجال، لكن تبين أنها تصنع الكراكيز فقط، بمجرد أنني كنت كادحا فقد جعلوا مني يساريا صحة، وجعلوا مني أحد الأصوات الحرة التي أخرسها المخزن بينما أنا مجرد صوت بياع وشراي كيغوت ريكلام ريكلام فأي سويقة.

جعلوني أظن أنه من الممكن أن يغير كروب في الفايسبوك النظام، أو أن تجعل ستاتو على صفحتي الشخصية النظام يرتعد لأنني صوت حر كما أوهموني، غررو بي وأقنعوني أن في الحركة البركة، وأننا خاصنا نخرجوا من الفايس ونزلوا للشارع كما فعل الآخرون هناك، ونزلنا ولكن للأسف كنا قلال، ونزلوا معانا وحدين خريين ولكن للأسف كانوا نازلين غي يتسركلوا.

قالوا لي أن المخزن هو العدو، وملي كنسولهم شكوناهو المخزن، واش كتقصدوا بيه المردة لي كيجري عليا فالسوق، أو شي مخزن آخر مكنعرفوش، قالوليا راه المخزن هو القصر، وأنا بقيت تالف مابين لقصر لكبير ولقصر الصغير وقصر السوق، قالوليا راه مكنقصدوش لقصر كبناية وإنما ساكن القصر، وأنا حرت عاوتاني مع القصر راه ساكنين فيه بزاف، وهوما يقولوليا الملك، وشحنوني مزيان، قالوليا المخزن لي هو لقصر لي هو الملك هو سباب هادشي لي عايشينو، هاد الفقر والتهميش والظلم والحكرة والبطالة، وحيث أنا نية وماعارفش بقيت حتى أنا كنهلل على القصر، وهوما كيقولولي برافو سقراط، نتا شجاع نتا رائع، نتا كتقدر تقول داكشي لي مكنقدروش نقولوه حنا، عجبني الحال وعجبوني الجيمات، وخصوصا عجبوني الدريات لي ولاو كيقولولي السلام فالشات، تما تحلات ليا مزيان، ملي القضية فيها الدريات كيقولوا السلام أرى معندك، وأنا نبقى نهلل، ومرة مرة كنتلاقى بشي وحدة، ولكن للأسف المناضلات بحال الى مغربلينهم، عازلهم شي واحد، بحال الى التكوين الفيزيولوجي ديالهم هو لي كيخليهم يوليو مناضلات، والا شي وحدة تفرح القلب، ولكن مقطعتش الأمل وبقيت كنهلل وعجباتني البطولة الفايسيوكية حتى جبت الربحة، عام ونص ديال الحبس معقل عليا حتى شي مناضل فيه، من غير أن بعضهم فتحو ليا كروب فالفايس وبقاو كيشدو الفلوس بسميتي(الله يسامح).

من بعد مخرجت من العام ونص، بغاو عاوتاني يستغلوني وينفخو ليا البعرة، قاليك عاودلينا على ملابسات اعتقالك، وحنا راه تضامنا معاك، ملي نكرتهم ومابغيت نهدر مع حد قالوليا بعتي الماتش وقلبتي الفيستة، أنا عاوتاني وحيث نية قلت أرى نيت نبيع هاد الماتش، وبقيت كنتسنى، ليوم يعيطوا غدا يعيطوا، وراه كيما لقاوني نهار شدوني غادي يلقاوني نهار يبغيو يشريو من عندي الماتش، لكن للأسف ماساومني، لدرجة أنني درت نداء فميد راديو، وهكاك ماتسوق ليا حد، قالوليا شي وحدين أن الماتش كيشريوه غي من عد اليساريين السابقين ومن عند السلفيين لي دارو مراجعة فكرية ونقد ذاتي أما نتا راك غي مخزني انبطاحي جينيا ظللت الطريق شي ايامات وراه ردوك لصوابك بداك العام ونص ديال الحبس اذن لاش غادي يشريو من عندك راه غي غادي يضيعو فلوسهم، مادمت نتا فالأصل ولدت لتكون منبطحا وأنه عندك ميولات جينية لتامخزانيت.
بقيت كنشوف فالناس كيشدو الكريمات، والإمتيازات، وبقيت كنتفرج فالفيزازي يحوز الزوجة تلو الأخرى من مختلف عرقيات المغرب، حتى أصبح منزله المكان الأكثر ديمقراطية وعدلا من حيت التنوع العرقي وأصبح منزله مغربا مصغرا بكل عرقياته، كنت أشاهد صوره في الفنادق الفخمة المامونية كمثال، يتشارك نفس المكان مع العظماء مثل تشرتشل وبيل غيتس وأنا يالله لحقت معاهم كاتييب عمومي أجير لدى موقع كوود.

وبمناسبة هذا الشهر الكريم وحيث الرحمة كتطيح فالقلوب، فأنا قررت حتى نقلب على رزقي ونكتب هاد الطلب لسيدنا الله ينصرو، بمناسبة توزيعه للقفة الرمضانية، واخا أنا مكنصومش، ولكن راه غادا تعيني هاديك القفة باش ناكل رمضان على خاطري فالدار ونتجنب الإفطار العلني لي يقدر يردني لغبيلة عاواتاني، لذا أوجه هذا النداء الى سيدنا الله ينصرو بمناسبة هاد الشهر الكريم،.... بصفتي مواطن صالح وخلصت ضريبة الولاء الي تجلات فعام ونص ديال الحبس، وطبعا على خطى الفيزازي درت حتى أنا مراجعة فكرية ودابا والحمد لله راني مخزني انبطاحي عميل من درجة مردة، أرجوا أن تتفضل سيادتكم وتتفكرني حتى أنا بشي خامسة ديال الزيت وعافاك مابغيتهاش سيوف حيث عيان بغيت ويلور أو على الأقل كريستال أو لوسيور بالأوميغا3 وبغيت حتى أنا السكر ولكن مابغيتوش قالب الى كان ممكن بغيتو داك لمقطع طراف ديال أتاي حيث ساهل فالإستعمال و من ناحية الدقيق غي بلاش راه مكايناش لي تعجن عندي فالدار بغيت راصيوني كرواصة ومن ناحية أتاي الله يجازيك بيخير ونتا زعمة راك خيمة كبيرة راه مابغيتش قافلة حيث راها غي الزبل ديال أتاي وكنا غي كنتشايرو بيه فالحبس بغيت أتاي الشعرة 4011 .... وإلى تكرمتي ودرتي فالقفة شي جوا ديال لبرا فيه شي 5000 درهم والله منردها فوجهك ، والى وصلك هاد الطلب ديالي ونتا راشقاليك وفنهارك راه معندي موشكيل الى تبرعتي عليا بشي كريمة وماشي بالضرورة ديال كار بحال مونة فتو أنا بغيت غي ديال طاكسي صغيرة وأنا لي نسوقها إن شاء الله طبعا من بعد متتكرم عليا بشي تيليفون منك لموالين الوقت يحيدو ليا لوسخ ديال الحبس من الضوسي باش نقدر نشد بيرمي كونفيونس.... والله لا يضيع أجر المحسنين.