بالرغم من الاعجاب و الاحترام ديالي الكبير للمخزن كمؤسسة و اشخاص لي كانعتابرهم اذكياء وكايتعاملو باستراتيجية و حرفية مع احلك المواقف و لكن شي مرات كانحس بخيبة امل!

شخشيا، و من ديما، كانحتارم ذكاء المخزن !كايعجبني ! كايجيني stratége خطير ! تقدر ماتشوفوش شنو باغي و شنو ناوي ديك الساعة و لكن مع الوقت والمدة كايبان ليك بيلا المخزن ديالنا عندو اهداف بعيدة المدى و هادي اهم خاصية فالستراتيجية انو لي كايطراسيها يكون visionnaire كايشوف بعيد !و هاحنا اليوم عايشين فخيرو و ماعندنا عليه لاين هاد الساعة !
و لكن بالرغم من داك الاعجاب الكبير لي عندي بالمخزن مرة مرة كايدخلني الشك، كانقول آواه واش هدا هو المخزن لي كانعرف ! الذكي ! الخطير !لي ماكادارش بيه؟ المخزن لي عارف شكايدير …؟ خصوصا مثلا فاحداث فحال دوك الاحداث ديال السويد و دوك الوقفات لي دارو حدا السفارة فالرباط فاش جابو شي وحدين دارو فينا الضحك و ردو الوقفة كوميك بشي تصريحات بهلوانية فحال هاديك لي قالت ليهم " جابنا القايد و الباشا" ! و اليوم داكشي لي وقع للاساتذة فاش شدوهم المرود خلاو عشتهم و خلاو الدماياتهم سايلة ! فحال هاد الاحداث كايجيني المخزن ماتعاملش معاها بالذكاء المعهود و كاتخليني نحس بخيبة امل كبيرة فواحد المؤسسة لي عندي ليها احترام كبير.
حيت المخزن كان ديما مطلع النيفو حشومة نجيو تال 2016 و نهبطوه ! علاش غانفتاتحو هاد العام بالتصاور د الدم و السليخ و الفيديوات ديال المرود كايعطيو الهرماكة للاساتذة؟ و الوقت خيابت و الكاميرات شاعلين ! التظاهر حق مكفول ! خليوهم يتظاهرو و يغوتو و يعبرو على مطالبهم ياك ماقاسو تاواحد ؟ خليوهم يمارسو واحد الحق دستوري ! علاش غانوضو نسلخوهم و نخليو تصاور استاذات بدماياتهم كايدورو فالفايسبوك و فيدوات فاليوتوب و لي خلقو ضجة كبيرة و مازال خبارنا يجيبوها التاليين ! مازال التصاور يديرو بوم فالصحافة الدولية و تبدا عاوتاني تشوف دوك les unes de journaux كايناقشو مستوى حقوق الانسان فالمغرب و الوضعية الكارثية للتعليم و الوضعية د الاستاذ و معدل البطالة و نجبدو علينا النحل … فحال هاد الخطوات المتهورة ديال المخزن راه هي لي كاتخسر صورة المغرب على برا ديك الصورة ديال الدولة الحداثية ! دولة المؤسسات ! دولة الحق و القانون و كاع دوك الشعارات لي المغرب بغا يسوقهم على برا … كاتجي فحال هاد الاحداث و كادير ميسة لكاع هاد المجهودات و كاضرب فالزيرو سنوات ديال الماركوتينغ للدولة المغربية الحديثة! و نوليو حديث على كل لسان … و غدا نتساءلو علاش النرويج و لا السويد و لا سنغفورة سحبات الاعتراف ديالها بمغربية الصحراء و لا علاش الاتحاد الاوروبي وقف التعامل مع المغرب ! معلوم يوقع هادشي حيت ضروري مانخلصو ضريبة التهور واحد النهار و حيت لي حرثو الجمل دكوه المرود!
للأسف كانتمنا المخزن كيما عودنا دائما على مستوى عال من الذكاء و حنكة في التعامل مع احلك الأوضاع يطلع النيفو و يهز الباررا و كيما ديما يبين لينا الحنكة المعهودة فالتعامل بفنية و حرفية عالية مع اقود الأوضاع و يتفادى فحال هاد الهفوات لي ولات كاتحطو و كاتحطنا معاه فمواقف بايخة أوي!