هادوك اللي مكلفين بالتوصل فالقصر وفسفارة المغرب ففرنسا خرجو على زيارة الملك لباريس: ما تسوقاتش ليها الصحافة الفرنسية وحتى بات لخبار عاد داز عندنا. محمد السادس مشى مع هولاند فطونوبيلتو والزيارة فيها ما يتكال ولكن كي ديما كيكرهو الصحافة المغربية

زيارة الملك محمد السادس الى باريس ناجحة سياسيا وداك الشي لاخر وفاشلة فالتواصل. مرة اخرى علماء التواصل اللي خدامين فالقصر قرروا ما تكونش الصحافة المغربية. تقدمات طلبات اعتماد لصحافيين بالسفارة المغربية بباريس ولكن ما داوهاش فيها. النتيجة كانت ان الاعلام الفرنسي ما داهاش فاللقاء بين الملك محمد السادس وفرانسوا هولاند. القنوات الاخبارية كانت مادياها غير فترشيح باريس لاحتضان الاولمبياد الاربعاء 17 فبراير 2015 والصحف عاودات قصاصة ولا جوج ديال وكالة الانباء الفرنسية. كنعرفو باللي فالايليزي كاينين صحافيين كثار معتمدين ديال الجرائد الفرنسية وهادوك ما داوهاش فالزيارة.
فالمغرب الاهتمام كان بارد، باستثناء بعض المواقع كلشي تعطل، اليوميات اللي خرجو نهار لخميس ما فيهم والو باستثناء "لوماتان" اللي كتسنى الانشطة الملكية واخا توقع مع الوحدة ديال الصباح، حتى اليوم الجمعة عاد تكتب على الموضوع ولكن كلشي برد لخبار ما بقاش خبار.
دابا هاديك خيتنا اللي جات من السما وعطاوها مكلفة بالتواصل فالسفارة المغربية بفرنسا سهام السراج ها فين كيوصل وضع الشخص غير المناسب، ثم هادوك اللي مكلفين بالتواصل فالقصر ما بقاش فيدهم ما مسايرينش العصر. قدام فراسهم غير الاولى ودوزيم وميدي 1 تي ولاماب. كلشي كيتبدل الا عقليتهم والنتيجة الزيارات المهمة كتولي باسلة روتينية من خلال التغطية الاعلامية العيانة.
زيارة محمد السادس لباريس كان فيها ما يتعاود. هولاند بطونوبيلتو مشى مع محمد السادس حتى لمعهد العالم العربي بباريس، يعني رد ليه الدورة اللي دارها الملك فرئيس فرنسا خلال زيارته لطنجة. ثم مشروع المركز الثقافي المغربي بباريس فيه ما يتكال من غير ان ولد والعلو خداه كمهندس.