مذكرات معاذ الحاقد " من عكاشة لمولنبيك 22 " : من قصص الحبس..ملي تلاقيت "المصري" اللي سرق 11 كيلو من الذهب ف كازا و بالنهار

—

كان سيلونو مقابل مع سيلوني ،دري زوين وعندو فصالة ديال شي بطل فشي رياضة ، تشوفو تحگرو تگول غا شي كيليميني بغاو اتهناو منهم دارهم ادخلوه للحبس ، شحال خايبة تكون مدوز الاجرام والسلاح والروينة وملي تدخل للحبس تعيش مقموع ، هدا حال الكثير من الناس لي كنسمعو بيهم قباح فالسفيل
القصة ديالو كنت سمعت بيها عن طريق الصحافة قبل ما ندخل للحبس وتخايلتو شي عنصور لا يشق له غبار ، بعد مدة غادي نتعرف عليه عن قرب ، كان ساكن فالمعاريف وعايش حياة صحاب اللعاقة ملقب بالمصري ، كيسوگ لبورش كايين ومعندوش مع بنادم ، فعمرو شي ثلاتين عام ومزوج ومراتو داير ليها النقاب ، غير الرياضة ما كيكمي ما كيدير والو ، عندو واحد لمشية مبنتة الا شفتيه من لور تغلط فيه ، واحد النهار كان غادي قدامي وبديت كنضحك وكنگول ليه فول حمص فول حمص فول حمص اهو يتعصب كان غيضربي غير جاب الله عزيز عليه ، گال ليا معاد كون كان شي واحد اخر كون فرشختو نتا عزيز خليك عزيز ولا غنخسر معاك ……
غدور اللوقت وغيوقعو ليه شي مشاكل مع واحد لبزناز كان معاه فالسيلون وغيجيبوه عندنا لسيلون ، وغادي نبقا نبش فيه حتا غيعاود ليا القصة ديالو ، گالي كنت عايش الحياة وتاواحد معارف اشنو كندير خرج عليا غير خويا او واحد خونا كان كسحابلي ذكي ، ضربات لولين كنضربهم غير بوحدي مكنتيقش فالمغاربة ، لمغاربة مكلخين فكلشي وحتا فالسرقة ، انا عندي عقلية ميريكانية ومكنخليش ورايا الاثر ، ضربت ضربات مقودين ومعمرني طحت ولا تحنطت للبوليس، كاين شي ضربات لي لحد الان باقيين معارفينش مولاهم ، اي حاجة كنحسب ليها الف حساب وكنخطط ليها مزيان ولكن هادي مدرتهاش علا البال ، هاد العملية لي بسبابها انا هنا شحال وانا متبع خونا مول الذهب وعارفو معياش كيفيق ومعياش كيحل المحل ونهراش كيدي الذهب اعشر عليه فمديرية الضرائب فسونطر ڤيل ، ستة اشهر وانا حاضيه ..صافي ملي بانت ليا الضربة مزيانة وفيها الصرف مزيان قررت غنمشي ونتكل عالله ، فوق عشرة كيلو ديال الذهب واخا تخدم حياتك كاملة ، تافقنا انا خونا غنمشيو فموطور هو غير غادي اسوگ بيا حينت عندو مع لماطر وخطير فالطريق ، مشينا فالصباح وقفات طونوبيل قدام المديرية غير نزلو الذهب وقفنا عليهم كانو ثلاتة ، جبدت عليهم فردي مخافوش كسحاب ليهم غير كنضحك باش اتيقو تيريت لواحد فرجلو ما فهمو والو ، مكملاش جوج دقايق كنا قدينا المهمة وشريناه بحالنا ، انا كنت حاط طونبيل ديالي لكاط كاط فواحد الزنقة مخبية فعين الذئاب مشينا ليها حطيت فيها الذهب وگلت لخونا دي لموطور لواحد خوتنا بزنازة فالخرجة ديال كازة وانا غنلحق عليك ، متاقش فيا كان فيه الذغل لاح لموطور حدا واحد لكاريان ، وبسباب داك لموطور غيعرفونا حنا شكون ، لبوليس ملي لقاو لموطور بداو كيقلبو اهوما يلقاو بلي كنا بدلنا واحد لبنو عند واحد سيكليس فالمعاريف وبقاو متبعين الخيط حتا عرفونا شكون ، انا خويت لمدينة ومشيت عند شي خوتنا كنت متافق معاهم نبيع ليهم ذاك الذهب وطفيت لبورطابل ، لفلوس كنت كنحطها فسميت مرتي خارج المغرب ، صافي ملي عرفت بلي لبوليس كيقلب عليا قررت غنخوي لبلاد ، غنتاصل بالخوادري لي كان متافق مع لبوليس وغيكذب عليا غيگولي بلي راه مكاين والو غير رجع ، صافي حتا بديت كنوجد فراسي باش ننزل لكازة اهوما يقفو عليا لبوليس ولي جوندارم فالجبل فالدار لي كنت مخبي فيها ، كانو مراقبين المكالمات ملقيت كيفاش ندير نهرب كانو بزاف ، انا متريني مزيان علا بحال هاد شي ولكن العطاية اخويا مكخليوش ليك فرصة ، لي خارج علا هاد لبلاد هوما العطاية ، انا راه كنت كنسرق صحاب لعاقة ومكنتعداش علا الفقراء وكندير الخير ولكن هانتا كتشوف هاحنا حصلنا مع هاد لميكروبات والعطاية ، مكيشوفوش دوك كروش لحرام المسؤولين لي كسرقو فلوس الشعب ، هادوك هانيا واخا يعطيو بيهم مكيدخلوهمش للحبس ، كان عليا نكون شي سياسي ونسرق حتا انا علا راحتي ، كرهت الحبس الا بقيت فالحبس اخاي معاد مع هاد القوم غادي نحماق …. خاصني نخرج خاصني نشوف كيفاش ندير بأي طريقة ماشي بلاصتي هنا …..