— قريت تقريبا گاع داك شي لي مكتوب فالحيط وكان خاصني حتا انا نكتب شي حاجة ونخلي لاطراس … مكانش عندي باش نكتب ولكن طاحت ليا فكرة فراسي حمقة … لكتابة فالحيوطة عندي فالدم … كتبت فالطاولة ديال لمدرسة فالحيوطة ديال الدرب فالكراسة ديال طوبيس وحتا برتوشي كولو مزوق بالكتابة … نيتشه كيقول " اكتب بدمك فنعلم حينئد أن الدم روح ، وليس بالسهل أن يفهم الانسان دما غريبا …" والواليد كان كيقول ليا " اولدي هاد لبيت عندك گاع زوقتيه خاصك تعاودو فالصباغة …" ولكن مع الوقت تعود علا كتابتي وحتا هو لقيتو كاتب واحد النهار فالباب ديال دار " اغلق الباب بالتي هي احسن جزاك الله خيرا " … حينت عيا مايهضر معايا " متبقاش تردخ لباب اولدي ملي تجي معطل بليل " ولكن فاش كتبها فالباب بزز مني وليت كنسدو بحنان بحالا خايف علا لبيض ليتهرس …. الكتابة كانت من قديم الزمن… الاف السنين قبل الميلاد …ف 1853 شي باحثين لقاو لوحات طينية فالمكتبة الشخصية ديال شي ملك أشوري سميتو آشوربانيال في نينوي فالعراق …اللوحات لقاو فيهم " ملحمة جلجامش " لي كعتابروها الباحثين من اقدم القصص لي كتبها الانسان … اول كتاب غنقراه وغنحس بمتعة القراءة هو " الخبز الحافي " للكاتب محمد شكري … ملي كتقرا كتحس معاه بجميع الاحاسيس … كيضحك وكيبكيك ويقدر افيق فيك الغرائز الجنسية الا عشتي معاه وكطير بيك لعالم اخر … وهاذا بالنسبة ليا هو الكاتب الحقيقي … ماشي بحال شي كتاب كتقرا ليهم كيجيك الملل والإشمقناط و كتفكر فالتغوط بحالا تكيفتي گارو ماركيز … ومن بعد منو قريت للكاتب الايطالي ميكيافيلي كتاب " الامير" لي غنكتاشفو عن طريق مغني الراب توباك لي كان واشم اسم الكاتب فلحمو …. هاد الكتاب كيتقرا فالعلوم السياسية وكيقولو بلي جميع السياسين والدبلوماسيين والرؤساء والملوك ضروري عليهم يقاروه باش اساعدهم فالتحكم فالشعوب ديالهم …شي وحدين لي عاشرو الحسن الثاني كيقولو بلي كان كيحطو تحت الوسادة وضروري ميضرب طلة عليه قبل ما ينعس … تقدر تكون غا اشاعات وتقدر تكون بصح ….كتاب الامير تكتب فالقرن 15 وداك شي لي فيه كيطبق علينا حتا لدابا ومن اشهر المقولات لي فيه " * من الأفضل أن يخشاك الناس على أن يحبوك. * الغاية تُبرر الوسيلة." … "على المرء أن يكون ثعلبا ليواجه الفخاخ ويكون اسدا ليخيف الذئاب" الوم كل انسان يهتم بالقلاع والحصون ويثق بها ولا يهتم كثيرا بكراهية الشعب" سيلون لي حطوني فيه فالمحكمة كبير وكانو فيه شي بودرات ، ختاريت بلاصة علا ليسر ديال لباب هي لي بانت ليا مخبيا علا مول لوقت لي كان جاري معايا ومرة مرة كيضرب عليا طلة …. وبديت كنحفر فالحيط ببريكة ولبلاصة لي حفرتها كنحرگ كلينيكس وكنعاود نطراسي بالكحولية ديال لحريق باش تبان لكتابة مزيان … كتبت فالاول " عكاشة فاميلي " وزدت تحتها " معاد لحاقد مر من هنا " وبغيت نزيد فوقهم " عاش الشعب " .. بقيت كنحفر فالحيط بالبريكة وكنحس بواحد اللذة فشي شكل واخا ضروني صباعي محسيتش بيهم … قبل ما نكمل " عاش الشعب " سمعت صوت لبوليسي كيعيط بسميتي … اواه خاصني نكملها بقاو ليا غير ثلاثة الحروف … كنت يلاه كتبت " عاش ال " … الشعب معندوش الزهر … مابغاوهش اعيش ولا هو مباغيش اعيش … فالدرب كتبنا " عاش الشعب " اجاو صحاب الجماعة صبغوها بالجير واخا حتا هوما من الشعب … قلت لواحد فيهم واحد نهار لقيتو كيصبغ فالحيط علاش كتحيدوها ؟ … كيهضر معايا وخايف قالي هاد شي مس بالمقدسات وراه كاين غير عاش الملك … قلت ليه ياك الملك حتا هو واحد من الشعب وحتا حنا بغينا نعيشو معاه … متسوقش ليا ودور وجهو وبقا كصبغ … قلت ليه نتوما مسحو وحنا نعودو نكتبو صباغة موجودة …. وقف عليا لبوليسي حل لباب قالي معاد تبعني راه الجلسة ديالك غتبدا دابا شويا … قبل ما دخل الجلسة كاينة واحد لبنيقة كتبقا تسنا فيها حتا كيعيطو ليك … لبنيقة خانزة بالبول وريحت لگارو كتفكرك بريحت الجيور … كيفصل بيني وبين القاعة لي غنتحاكم فيها باب … بكثرة ما خلاوني نتسنا وليت معصب وكنضحك واحد الضحكة شرانية وباغي غير هيمتا يتحل لباب ندخل لقاعة … فالبنيقة كانو معايا شي وحدين حتا هو عندهم الجلسة … كل مرة كيتحل لباب كيدخلو واحد منهم بعد جوج دقايق كيرجع كاعي …. خلاوني انا الاخير …. فاش كتحل لباب كنطل من واحد الشق كيبان ليا لقاعة عامرة…
