اش كيدير هاد السلاوني عند البام؟ دابا يزيد واحد بحالو فالبام يديرو هيئة الامر بالمعروف ويرجع بيت الحكمة بيت الحسبة وتولي خديجة رويسي تدور فالأسواق تراقب إمتثال الأمة لفكر سي السلاوني

أولا أهنئ السيد السلاوني لإلتحاقه بحزب الأصالة والمعاصرة ، واخا الإنتقال من حزب لآخر فالمغرب ماشي شي حاجة تستحق المعايدة بحكم أنها كثيرة وعادية وجاري بيها العمل، ولكن بحكم أن هذا الخبر انتشر على المواقع الإجتماعية ومواقع الأخبار وحتى فيديو لي كيوضح فيه سي السلاوني سبب مغادرة العدالة والتنمية لي بارطاجاوه العديد من الناس ماشي المهتمين بالسياسة أو المنتمين لأحد الحزبين ولكن بارطاجاوه بزاف ديال الناس من باب اشتراك مادة مضحكة مع الأصدقاء ، وملي تفرجت فالفيديو صدق حقا مادة مضحكة سريالية كاع .
مشيت كتبت اسم السلاوني فكوكل ، طلعات ليا أخبار عليه كثيرة فمواقع محلية وخصوصا أو التحاقه بالتراكتور ، وعناوين بعد الأخبار كانت سريالية أكثر مكاين غي زلزال يضرب العدالة والتنمية بفاس ، أو صيد ثمين لحزب الجرار ، وطبعا لا يمكن التفوق على موقع كود فإبداع عناوين الأخبار ، والذي عنون هذا الخبر بعاجل الياس العماري ضرب تصرفيقة خايبة للبيجيدي ، طبعا من خلال هاد العنوان كيبان للقارء أن موقع كود بعيد بزاف على باقي المواقع الأخرى التي تمشي في طريقه من خلال محاولة إبداع عناوين مثيرة ، موقع كود كيتخالط ليك فيه عنوان المقال مع بيت شعري لرامبو وللى ديك الجن .
ولكن ملي تفرجت الفيديو مابانلي لا صيد ثمن لا ضربة موجعة إلا من خلال كومة الأصوات التي سيجرها معاه للحزب الجديد أما من ناحية اضافة ما للفكر الحزبي ديال التراكتور فخونا طلع عايش فعالم آخر، كيفاش قدر واحد من أسباب انسحابه من حزبه هو أنه ماحاربش المواقع الإباحية ، فأنه يولي قيادي فهاد الحزب، واش زعمة بصح بصح سبب الإستقالة هي عدم القضاء على الخمور والعري والأفلام الإباحية، إلا كان هذا هو السبب فالأحرى بسي السلاوني كان يلتاحق بجبهات القتال فسوريا لإحدى الجماعات الإسلامية هناك هي لي قدرات تحارب العري والخمور والأفلام الإباحية (وهادي صعيبة)، ماشي فأنه يلتحق بالأصالة والمعاصرة لي حزب بمرجعية حداثية، طبعا مكيشجعش على العري ولكن كيدافع على الحريات الفردية ، دابا خاي السلاوني يعيب على العدالة والتنمية عدم محاربتهم لهادشي وبأنه بسباب هادشي ستاقل والتحق بخديجة الرويسي في إنتظار أن تسدل على نفسها بالنقاب .
هي الصراحة محاربة الأفلام الإباحية صعيبة شوية لا على العدالة والتنمية والا حتى على البام، حيث بزاف منهم كيتصوروا خارج نفوذ المملكة ( وكاين لي كيتصوروا هنا ) أما الإنتاج المحلي راه تشوفوا تولي عنين أبد الدهر، ولكن أنك تلتحق بحزب حداثي بسبب عدم تحقيق الرؤية الرجعية ديالك فحزبك الأول فهادي عاوتاني بزاف، وحتى ملي بديتي تمدح هدرتي على الأصالة والمعاصرة كحزب فيه خليط من المغاربة وفيه المحجبات وفيه شي ملتحي كاع ، علما أن اللحية كاينة تاعندي أنا نيت ، الصراحة طلع بصح فيديو مضحك حيث إلا كانوا هادو هوما القياديين لي بسبابهم يتزلزل حزب في مدينة ما ، أغي الله يعطينا الزلزال كاملين، ونموتوا وحنا عريانين وكنتفرجوا فالأفلام الإباحية قبل مايحاربها سي السلاوني أنطلاقا من حزبه الجديد، لي الى زاد غي شي جوج بحال السلاوني غادي يولي هيئة الأمر بالمعروف والنهي عن المنكر وبيت الحكمة غادي يولي بيت الحسبة وتولي خديجة رويسي تدور فالأسواق تراقب إمتثال الأمة لفكر سي السلاوني.