شوفو على نقابة كيف دايرة. حكمو على صحافي بالحبس وداز قانون خطير زمو فمهم وجا مدير بغى يجري على اللي ما فيديهمش دخلو الدستور حقاش مسات مصالح شركات انتاج ديال صحابهم وكيعرضو عليهم

النقابة الوطنية للصحافة المغربية ما فيدهاش وكل مناسبة كتبين باللي خاصها بزاف باش دافع علي الصحافيين. اخر ما دارت بيان ضد المدير العام الجديد ل"ميدي 1 تي في" حسن خيار. كول كانت هاد النقابة فيها الشجاعة تهدر على شكون كيدعم هاد المدير وتجبد الماجيدي ولا غيرو ولكن ما فيدهاش. ياك يالله تعين وما يمكن حتى لشي نقابة فالعالم تصدر بيان على مدير يالله تعين.
بيان النقابة كال باللي "أن الأجهزة المسيرة لهذه القناة تتحمل كامل المسؤولية في القرارات والأوضاع التي آلت إليها هذه المؤسسة".
وقالت ان ما قام به المدير الجديد محاولة ضرب الحق في العمل النقابي من طرف الإدارة الجديدة خلال الأيام القليلة الماضية، وهو حق مضمون بقوة الدستور والمواثيق الدولية، مستنكرة وبشدة لغة "التهديد وخطاب الترهيب والمس بكرامة الصحفيين والعاملين التي تنهجها إدارة قناة ميدي 1 تيفي". حسب تعبيرها.
وباش كملاتها النقابة كالت ليك طرد المنشط يسري المراكشي تصفية حسابات سياسية. ياك لاباس ياك ما المراكشي من اليسار الجذري ولا العدل والاحسان. دابا نهار تحكم بالسجن على صحافيين بحال انوزلا وهاد الايام حميد مهداوي النقابة ما حلاتش فمها ولكن حقاش بعض شركات الانتاج اللي صحاب ناس النقابة ضررات من هاد القرار رجعاتو تصفية حسابات سياسية.
النقابة ما عمرها دافعات على الصحافيين ديال ميدي 1 تي في واليوم باغية تدخل ليها مع هاد المدير الجديد. يا صحاب النقابة وغير فرقو لفلوس على الصحافيين اللي عطاها ليكم الخلفي باش يدوز قانون الصحافة اللي فيه الحبس. معارككم خاصها تكون ضد هاد القانون اللي كيهدد حرية الصحافة واللي متخلف فبعض بنوده ماشي الدفاع عن مصالح شركات انتاج