بنكيران يقوم بصناعة مصطلح "التحكم " كعدو وهمي أو "بوعو" من أجل فعفعتنا

من المتعارف عليه في اللعبة السياسية و بالاخص عند الانظمة العريبانية ،أنه أي زعيم سياسي أو (رئيس حكومة) زگّا وتادو نسبياً في السلطة ،الاّ وكيولي مجبر أنه يصنع شي عدو وهمي كيكون بمثابة "بوعو"كيخلع به الغوغاء والناس البسطاء،وكيرقّد به ديما دوك لحوالا لي كيكونو تابعينو،
وكما يقول نيتشه في محكم احد كتبه :من كان يحيا بمحاربة عدو ما،تصبح لديه مصلحة في الابقاء على هذا العدو حيا…
حيتاش فين كتكون واحد السلطة "استبدادية"وفاشلة في تدبير الشأن العام تحكم واحد لمجموعة ديال الناس ترى فيهم مجرد قطعان ،لابد لها طبعا من واحد الشماعة تعلق عليها دائما أخطاءها ،وتبرر بها فشلها،
وفي نفس الوقت وبالموازة مع ذلك يُستعمَل أحيانا داك (العدو الوهمي) كفزاعة من أجل خلق هاجس من التخويف عند عامة الناس ،
وهادشي شي حاجة جاري بها العمل في لكثير من لبلدان على حسب دواعيهم….
لماريكان نهار بغات تبسطت سيطرتها، وتقوم برأسملة العالم كان كتستعمل بوعو المد الشيوعي "الاتحاد السوفياتي"….
السعودية منين حسات بلا كاين هناك تهديد لنفوذها لقات فزاعة المد الشيعي على طبق من ذهب،وياما خلعو به الناس عن طريق اعلامهم الوهابي ……
والاسد والقذافي ومبارك والسيسي گاع كلهم تقريبا في الوقت لي حسو فيه أن نهايتهم قربت، خلقو ذريعة الارهاب باش بداو كيخلعو الناس ويبررون فشلهم،
هذا في الوقت لي مرسي كان تاهوا بدوره خالق شماعة الدولة العميقة لي ماخلاتوش يخدم على خاطرو، ودارو ليه قاليك لعصا في الرويدة،
وبالنسبة للمغرب مانساوش حكومة التناوب بقيادة عبد الرحمان اليوسيفي لي كان كيدعيو _نهار ومطال_ بوجود ما يعرف ب"جيوب المقاومة"، لي كينسبو ليهم كل أسباب فشلهم …….
واخير سي عبد الاله بن كيران للي في الاونة الاخيرة بمعية وليداتو المخلصين إختلقو واحد العدو وهمي من نوع خاص جدا، خاصة فين عرفو بلا غتدار ليهم الصابونة من لحكومة،ناضو التجئو الى التلويح بوجود عرقلة من طرف ما بات يُعرف بالتحكم للي ديما كيتحدثو عليه بصيغة المبني للمجهول،الشيء لي كيجعل العديد من الاسئلة تتباذر للاذهان عند بزاف ديال الناس "ولي طبعا ماعمرو غادي يجاوب عليها،لانه كيفما سبقت الاشارة من مصلحته الابقاء على هاد العدو»» التحكم«« حيا…الى ان يقضي الله أمرا كان مفعولا..
حيتاش في اعتقادي وعلى_ حسب هضرتهم_ القضية را في منتهى البساطة ومافيها تا شي تعقيدات … كنتي أسيدي تُقرّ بفشلك الذريع فهاد الخمس سنين كاملة نتيجة وجود "عدو "تصفه بالتحكم والعفاريت وماعرط اش داك العجب، ولقيتي راسك مجرد كومبارس في الدولة خرج ديك الساعة حطهم نعماسيدي بوجهم وشرح لينا بدون اي ضبابية شنو كتقصد بهاد التحكم والعفاريت، لفائدة من كيخدمو،باش تاحنا نحاربوهم معك…ماشي نتا جالس مفطح ليا فالحكومة خمس سنين ،وهما "كياكلو بيك الثومة" وكيدوزو بك لقوانين والزيادات حتى سالاو منك وحسيتي بهم غيزرفوك عاد جاي كتقول لينا لا حگا ماشي انا لي كنتحكم هاد خمس سننيين …وشكون خالتي؟…
وخ اسيدي ومنين كاين التحكم وعقتي بلا را ماشي نتا لي كتحكم علاش غا ما زايد فيه و طامع فولاية ثانية
و جايب الشيوخ ..والشيخات..وكتستعمل أي وسيلة تخليك تعاود تبقى فلحكومة, ونتا عااااارف را ماغاديش يخليوك" العفاريت"تحارب الفساد ؟؟؟ …اش هاد التناقض ..واش كتضحك علينا اسي بنكيران ولا اش قاليك راسك؟