ما بين حلب تحترق وحلب تتحرر ضاع المنطق

حلب
تتحرر ، حلب تحترق ، هادو جوج وجهات نظر حاليا لي مسيطرة فالمواقع الإجتماعية ، بين فرح لعودة حلب الى سلطة النظام وبين باك لسقوطها ، كأنها سقطت في يد محتل غاشم ، هو الصراحة حنا الأمر ماواصلنا بوالو ، من غير صور الجتث والقتل والتنكيل فالمدنيين من طرف كل الجهات
المسلحة ، حلب تحررت وعادة الى الدولة بمساعدة دول أجنبية وماشي جيش النظام بوحدو ، كذلك كان وقع فالمغرب فثورة الريف والقصف كان بمساعدة فرنسا واسبانيا ، وعاد الريف الى حظن الدولة ، ومكنظنش أن أي واحد من هادوا لي كيتباكاو على سقوط حلب غادي يقدر يقول شي حاجة على
الريف لي تخمدات فيه الثورة التانية بنفس الطريقة تقريبا ، وبزاف منهم بالنسبة ليه الريف أرض مغربية وهادوك غي أوباش بغاو يزرعوا الفتنة فالبلاد ويقسموها، طبعا هذا جزء بسيط من سكيزوفرينيا المواقف عند المواطن المغربي المهتم بالقضايا الدولية .
تاواحد من صحاب حلب تحترق ألى ناضت مظاهرة فالصحراء مثلا كتطالب بالإنفصال غادي يكون مؤيد ليها ، وطبعا غادي يتموقف ضد هادوك الناس ويوصفهم بأبشع النعوث وبأنهم عملاء للجزائر ومنعرف شنو ، ولعكس الى تعاملات الدولة معاهم بهدوء وروية وديبلوماسية ، غادي يبدى يتباكى على العهد
القديم ، ويبدى يقول بأنهم لقاوها سابت وأن خاص غي الدولة تعطي الأمر ويهبط هو وجيرانوا والمغاربة كاملين يخمدوا المظاهرات تما ، حيث دوك الناس شبعوا خبز وماباغينش العيش الرغيد تحت حكم الدولة المغربية ، وطبعا ماغاديش يعتابر راسوا شبيحة مثلا ، بل غادي يعتابر راسو
وطني كيحارب ضد أعداء الوطن لي باغين يقسموه دويلات .
ولكن فحالة سوريا كيسميوها ثورة ضد النظام الظالم الغاشم القمعي الديكتاتوري المعذب المكمل الوحشي الفحشي القتال لي كيجيب لسوريا البيدوفيا والأمراض ولابروتوتيسيون والحشيش ولي بغيزون ولا توغتو هادو كلهم خاص يتحاربوا اينفوا بوغ توس ، وأي واحد كيدافع عليهم خاص يموت ،
هاد الإزدواجية ديال المواقف والرؤى قريب تولي ماركة مغربية مسجلة ، لدرجة ولات شاملة كولشي حتى فالمواقف اليومية ، هو الصراحة حلب ماشي تحررات وانما سيطر عليها جيش نظامي حتى هو بخبيزو من جرائم فحق الإنسانية وداكشي ولكن هادشي ضروري لأي نظام من أجل البقاء فالحكم
، ولكن باش تتباكى على حلب تباد بحال الى كانت أصلا محررة راه لحماق هادا ، راه حلب كانت مستعمرة من فيالق المتشددين والقتلة والأصوليين من كل بقاع العالم ، كاع لي كان باغي يقتل ويعذب وينكل ببنادم ومالقاش كيفا شجا لسوريا دار لحية وبدا يقتل فالسوريين أنفسهم.
للأسف
وككل مرة حلب تحترق غزة تحترق ، سريبرينيتشا تحترق ( هادشي قبل ايام الهاشتاك كان كيوصلنا عبر الكاسيط وكان خطباء الجمعة كيخطبوا من المنابر على وحشية الصرب ، وأنا عاقل فخطبة الجمعة وباقي صغير قالينا الخطيب بلي أن الصرب شدو مرأة حامل وشقوا بطنها وخرجوا الجنين لاحوه
ودارو بلاصتو قطة صورة مافرقاتنيش لحد الآن)، ولكن واش هاد المناطق بصح تحترق ولا غي بروباغندا يسارجية أسلامية بحال ديما من أجل تبني كاع قضايا الكون ونسيان قضيتنا الرئيسية ولي هي طرف ديال الخبز الذي لم يعد متاح فهاد الوطن ، الصراحة بقوة التكرار أصبح الأمر ممل
وباعث على الغثيان لدرجة وليت كنعتابروا مرض عند هاد الناس ، مرض مشاركة المآسي عبر العالم والإنتفاع منها.