خاص: البلوكاج الحكومي مازال ما ديبلوكاش. الاحرار متشبثين بحزب العود وها تخوفهم وردهم غادي يكون اليوم وبنكيران حاسم: اللا يعني اللا وقيادي من البي جي دي ل"كود": هادا منطق غريب رافضين الاستقلال وباغيين يجيبو اللي بغاو شكون رئيس الحكومة؟

البلوكاج الحكومي مازال ما تفكش مائة بالمائة. المشكلة اليوم فعدد مقاعد الاغلبية. ايلى دخلات الاغلبية السابقة وشكلات الاغلبية غادي يكون عندهم 202 مقعد اي 3 مقاعد زايدين على عدد النواب اللي يقدرو يمنحو للحكومة الثقة. هاد القراءة دايرها التجمع الوطني للاحرار اللي كيطالب بتوسيع هاد الاغلبية ويتزاد حزب الاتحاد الدستوري خاصة انه دار معاهم تحالف قبلي وكاين تنسيق اللي غالبا ما يوصل لاندماج او ادماج.
حسب ل"كود" التجمع ما باغيش يدخل لحكومة ويمكن غدا تتقبل طعون فالمجلس الدستوري والحكومة تفقد الاغلبية. الحزب وفق مصادر "كود" غادي يخرج بيان اليوم الجمعة باش يشرح وجهة نظرو من فيتو حزب العدالة والتنمية على الاتحادين الدستوري والاشتراكي اللي كان باغي حزب الحمامة يدخلهم معاهم.
حزب العدالة والتنمية كيف ما عبر امينو العام رئيس الحكومة يوم امس في تصريح ل"كود" وعقب اجتماع الامانة العامة للحزب حتى حزب ما غادي يتزاد على الاغلبية السابقة =التجمع الوطني للاحرار والتقدم والاشتراكية والعدالة والتنمية والحركة الشعبية". قيادي رد على توسيع الاغلبية بالقول ل"كود" "كون بغاو الاغلبية الموسعة كون الحكومة تشكلات يوم 30 اكتوبر وما نضيعوش الوقت. حقاش مع حزب الاستقلال وكان ممكن يدخل حتى الاتحاد الاشتراكي والاتحاد الدستوري =ما كانش العيب خرج= غادية تكون حكومة بنكيران عندها اغلبية مريحة وبزاف بزاف. الاحرار دارو فيتو على الاستقلال وباغيين يشكلو حكومة هما بصحابهم، هاد الشي مرفوض" يشرح المصدر ل"كود".
هاد الشي يعني ان البلوكاج الحكومي مازال ما ديبلوكاجش ويمكن نتسناو شي ايام باش يوصل بنكيران واخنوش لاتفاق