يا صحاب المصالح العليا للوطن راكم كتقتلو الوطن وتهيئوا لدفن تجربة ديموقراطية فتية بزاف. صحاب البي جي دي يهاجمون "قادة الهزيمة" اللي خانو الشعب وباعو الكلمة

حشومة وعيب وعار ان قللة قليلة من الديموقراطيين اللي دانت هاد المسلسل ديال قتل التجربة الديموقراطية الفتية بزاف اللي عندنا فالمغرب. غريب وعجيب ان عدد منهم ماشي غير سكت بحال بقايا الاتحاد الاشتراكي بل فرحانين حقاش غاديين يدخلو الحكومة. باين شي وحدين منهم شراو الحوايج وموجدين للديوان ولمناصب اخرى. حقارة ووضاعة من قادة البي جي دي يلوحو بنكيران ويطيو صفحتو.
قلال اللي هزو صوتهم بحال الباحث محمد الناجي واليسارية لطيفة البوحسيني واصوات اخرى محسوبة على الصف الديموقراطي ومعروف عليها مواجهة الفكر الظلامي فالقضايا ديال الصح.
البوحسيني كتبت تدوينة تنعي بنكيران "أعتقد أن بن كيران قدم كل التنازلات الممكنة، لكنه وصل عند خط لايمكن تجاوزه، لانه لو تجاوزه سيفقد الإرادة الشعبية والانتخابات معناها السياسي، وعلى هذا الاساس الاستاذ عبد الإله بن كيران يحترم، لانه قاتل بشراسة لإثبات ان هناك حدا ادنى لا يمكن النزول دونه". تدوينة تلخص ما يفكر فيه عدد من قادة العدالة والتنمية الشباب ماشي اللي باغي الوزارة.
شباب تقاتلو باش يدافعو على حزبهم على قائدهم بنكيران ولكن تصدمو ماشي من هاد الشي اللي وقع ولكن من السرعة في قتل مرحلة بنكيران. الصحافي عبد الصمد بنعباد واللي ما كيخبيش دفاعو على حزبو العدالة والتنمية دار شعار توصيفي لما رأه واقع حال حزب امن به "يا قادة الهزيمة. خنتو الشعب وبعتو الكلمة" هاد الشعار المعدل حطو هاد الصباح باش يبين فين وصل هاد التضحية بتجربة يعتقد انها مهمة للمغرب كي يستمر على الطريق الصحيح للديموقراطية
اليوم السبت تجتمع لجنة اختيار الوزراء. حتى هاد اللجنة ما كينتظر منها صحاب البي جي دي المصدومين والو. عارفينها شكلية وعارفين ان بنكيران ما غاديش يدخل فيها.