واش صحاب "الشرعية الشعبية" و"احترام ادارة صناديق الاقتراع" بداو ينظرو لقبول الوردة الدابلة فالحكومة وبزز منهم

تدوينات وتصريحات قيادات العدالة والتنمية بعد ما تسرح ليهم اللسان وابعد القصر رئيس الحكومة السابق امينهم العام عبد الاله بنكيران٬ كلها كتوجد القواعد ديالها اللي عبئوها وشحنوها مدة اشهر باحتمال كبير قبول حزب الاتحاد الاشتراكي او كما قالت برلمانية الحزب عن الحي الحسني في الدار البيضاء والقيادية في المصباح امنة ماء العينين في تدوينة عن تقديم البي جي دي للوطن قبل الحزب وهاديك الهدرة الخاوية. ما عارفاش باللي الوطن محتاج لحزب رافع الراس باش يمشي للقدام لحزب ماشي لحزب يخرج هاد العبارة اللي كتسعملها الانظمة الديكتاتورية باش تقمع شعوبها "المصالح العليا للوطن".
عبد العالي حامي الدين حتى هو مشى بعيد وبدا كيخرف بتدوينة فعمقو يستحيل يقبل بها. قاليك اسيدي "لا يتعلق الأمر فقط بالتحديات الداخلية المتمثّلة في ضرورة استكمال جدول الأعمال الديموقراطي لبلادنا والإسراع بتشكيل حكومة سياسية قوية مدعومة بالشرعية الدستورية والديمقراطية ومحترمة للإرادة الشعبية ولكن هناك تحديات إقليمية ودولية تستوجب من كل الفاعلين تغليب المصلحة العليا للوطن والحرص على بناء توافقات قوية قادرة على رفع هذه التحديات، وهو ما يستدعي من مكوّنات المجتمع المغربي الداعمة لخيار الإصلاح في ظل المؤسسات الاستمرار في التفاعل الإيجابي مع التراكمات التي حصلت، وتحصين المكتسبات التي تحققت، والنضال من أجل تقوية هذا المسار من الناحية السياسية والاجتماعية والاقتصادية والحقوقية، والمساهمة في تعميق الاختيار الديموقراطي سياسيا وثقافيا".
السي الفاهم استاذ العلوم السياسية باش انت عارف هاد الشي نظر لنظام ديكتاتوري على حقو وطريقو وعلاش خسران لفلوس فهاد الانتخابات. علاش كتضحكو على الشعب وترفعو شعارات الاصلاح وووو
علاش كتجي امنة ماء العينين اليوم وتقول ضد ما قيل فالحملة اللي جابت للحزب 125 مقعد واللي الجهات اللي كيعرفوها مزيان دارت يديها ورجليها باش ما يجيوش الاولين. كيفاش الالة امينة "حزبنا قدم الدروس في السياسة و الأخلاق السياسية،و قدم الدروس في حب الوطن و الولاء له.
أميننا العام تنازل عن ثاني منصب في الدولة بكل "امتيازاته لمن تستهويه الامتيازات" وفاء للارادة الشعبية.
رئيس الحكومة المكلف الجديد (رئيس مجلسنا الوطني) يحاول جاهدا بناء حكومة تخدم الشعب في ظل اكراهات ليست بالسهلة"
هادي اسمها الخيانة. خيانة ثقة مصوتين. ثاقو فيكم. شي ريبو ليهم ديورهم بدعوى البناء العشوائي غير حقاش صوتو عليكم شي رفضو ينقلو ليهم ولادهم للمدرسة غير حقاش صوتو عليكم. هاد المواطنين البسطا كانو اشجع منكم. صدقوكم وانتوما اليوم كتوجدو تقبلو بالذل بالاهانة بالانبطاح