— ف الايام الاولى للي جيت فيها ل بلجيكا, ملي كان الجار العجوز "باتريك" باقي كيجبد معايا الهدرة و كيقول لي بونجوغ و هو كيضحك حيت كيشوفني ماشي جاي ب "باكيط" عوض الخبز البلجيكي الاكبر و الارخص..كان ذات نقاش قال لي جملة حيت تا هو عاش شوية فالمغرب ..يمكن يكون ما قالهاش اصلا و انا فهمتها بترجمتي غلط ..غادي نتاكد ف كل مرة و فكل تجربة انها صحيحة: " افضل المغاربة هما للي عايشين فالمغرب"..تاكدت النظرية ديالو ملي وقعت التفجيرات و تورطو فيها المغاربة و بدات النقاشات على واش هما مغاربة و لا بلاجكة..حيت اذا كانو حاملين للجواز الاوروبي فهما عندهم ايضا تا الجواز المغربي ..للي المغرب كيعتبرهم بيه و كيعاملهم بغاو و لا كرهو ..حتى جنائيا ..كمواطنين مغاربة ..كنهدر على النقاشات الجدية فالتلفزة البلجيكية ماشي ديالنا فالمغرب للي كيلخص لك المسألة ف خبر منشور ف الصحافة ..ف اذا كان مشرف ف هو كيكتب على شكل " مغربي مقيم ف بلجيكا يحصل على كذا" و اذا كان خايب ف هو " بلجيكي من اصول مغربية يقوم ب كذا "..النقاش كان تا فالدار عندنا ..و اذا محمد كان قال و هو متكي كيقلب فالتلفزة على "روتانا" انه هادو ديالهم و انهم هما للي رباوهم و خلاوهم هاكدا ..حيت المغاربة الاصليين اما وفيين للعرش اما كيعرفو حجم القرعة للي يقدر يستناهم فالمغرب اذا غي فكرو يعملو فحال هاد الشي و حتى اذا ماتو شنو غادي يقدر يصير لعائلاتهم للي غادي ياديو ثمن للي انتحرو باهضا فالكوميساريات .. ف رضوان شعل جوان و قالنا و هو كيسوط الدخان بصوت خافت انها مؤامرة بلجيكية ضد المسلمين.. في حين انا و المختار كان راينا واحد ..انهم اصلا ماشي مغاربة و ماشي بلاجكة و انهم صنف هجين تولد من زواج نوعيين من عالمين منفصليين ف عطاو نوع ثالت ما هو بلجيكي و لا هو مغربي ..تماما فحال ملي كيتزاوج كلب و ذئبة و كيعطيو "شيان لو" صغيور كيكبر و هو غريب بين الكلاب و غريب بين الذئاب ..رضوان ضحك ملي سمع هاد التشبيه ف اضاف "شيان لو كيشوف الكلب و كيسميه "خوروطو" ". ملي تعلنت اسماء الارهابيين و طلعو ف أغلبيتهم من اصل مغربي و انهم كانو عايشين ف بروكسيل..و اتضح ان صلاح عبد السلام الارهابي الوحيد للي ظل حي و للي كان عندو هو و خاه "ابراهيم" المنتحر ف سان دوني بار ف "مولانبيك" قبل ان يقرر انه يمشي للجنة صافي .. رجع من باريسلبروكسيل بدون ما يوقفو حد و نزل ف سوق "بوكسطال" للي حدانا ف "لاكن" و شرا منو حوايج و لبسهم و مشا باش يتخبا كما لو كان ف رحلة سياحية.. بدات حالة الاستنفار و بانت صورة صلاح ف جميع المحطات التلفزيونية على انه المطلوب الاشهر ف بلجيكا و طلع مستوى التهديد الامني ف كل بلجيكا لاقصى درجة كتعادل مرتبة اعلان الحرب, حتى انه فاليوم نفسه خرج الجيش للشارع و بدا البوليس كيقوم بحملات تفتيشية عشوائية للبحث عن اي شخص "عربي" مشتبه به..و عن اي شخص شكوا فيه الجيران للي طلبت منهم السلطات الابلاغ عن اي حالة بانت لهم غريبة ..كنت عارف اني اذا خرجت ف غالبا غادي نتعتبر غريب تا من عند "باتريك" و غادي يديكلاري بيا ف جلست ديك الايام فالدار و لم اخرج ابدا..بقيت كندوز نهاري كنسمع الاخبار فالتلفزة او كنقراهم فالبيسي و ملي كنسالي القراية كنشد التلفون باش ناكد ف كل مرة للدار و لنورين انهم باقي ما شدوني ..و ان كولشي غادي يدوز مزيان..لكن ملي بدات المداهمات كتقرب من الحي للي كنسكن فيه و شدو ياسين خاه د صديقنا مصطفى ..و مورها تم تطويق "مولانبيك" ف بزاف د المرات و منع الناس اثناء عمليات المداهمة حتى انهم يطللو من النافذة.. رجعت متوتر بزاف و كنخاف تا نوقف خدا الشرجم عندك شي حد يشوفني.. و بقيت محافظ على هاد العادة تا من بعد ملي هدات الامور ..و تا ملي بديت كنخرج فالصباح ملي الحياة بدات كترجع لطبيعتها قبل ان تتبدل للابد ف الانفجارات القادمة ف بروكسيل..كانت ظاهرة على الناس علامات الخوف من كل واحد ماشي ف الطريق فحالي: شاب منفرد عندو سحنة داكنة… حالان التفتيش ف الشارع رجعت متكررة ..كنكون خارج تا كيعيط عليا الدغبوش باش يقول لي ان البوليس واقفين فالمترو كيقلبو الناس ..و كنرجع فحالي ..ملي جا معاذ الحاقد و قرر انه يدفع اللجوء ف بلجيكا سولني و حنا جالسين فالقهوة و كنا يا الله تلاقينا من ايام كازا ..علاش ما ندفعش تا انا لجوء ف بلجيكا و ما نبقاش ديما خايف هاكدا.. على الاقل نربح حق الاقامة لشهور ندور ببها ب كل حرية ف بلجيكا على ما يدرسو الملف و يقررو ..حيت ما دام ما عندكش رد مازال من عند السلطات ف تقدر تتحرك و تقرا و تخدم قانونيا ..قلت لو اني جيت ب فيزا فرنسية و ما عنديش الحق ..حيت القانون كيقول ف اتفاقية دبلن انه باش تدفع اللجوء ف شي دولة لازمك تجي ليها بفيزا ممنوحة من طرف نفس الدولة..ف اذا قدمتي لجوء ف بلجيكا و نتا عندك فيزا اسبانية او فرنسية فحال حالتي, ف غادي يردوك للدولة للي منحتك حق الزيارة باش هي تدرس طلبك ..و العودة كتكون اما طوعا اذا شافو فيك انك غادي تغادر بالخاطر و في حالة خافو منك و هي الحالة الغالبة كيصردوك ب مينوط ل مركز احتجاز مغلق ف الدولة للي عطاتك الفيزا تبقا فيه حتى يجيك الرد ..اذا كان ايجابي تاخد الاقامة و اذا كان سلبي ترجع ف اول طائرة للمغرب. او يمكن لك تستنا ستة اشهر مور ما كتتسالا الفيزا ديالك و تدفع وراها فاي دولة بغيتي.. و اصلا كان باقي لي غي شهر..و دفعت. ——————————————————————————— الحلقات السابقة: – ( الحلقة الاولى : http://bit.ly/2s3GmGK ) – ( الحلقة الثانية : http://bit.ly/2rAO2mR ) – ( الحلقة الثالتة : http://bit.ly/2rXOVp7 ) – ( الحلقة الرابعة : http://bit.ly/2sERrxk ) – ( الحلقة الخامسة: http://bit.ly/2rVT9xW ) – ( الحلقة السادسة : http://bit.ly/2skjpll ) – ( الحلقة السابعة : http://bit.ly/2rdle40 ) – ( الحلقة الثامنة : https://goo.gl/Xo4Vox) – ( الحلقة التاسعة : http://bit.ly/2scqZvW ) – ( الحلقة العاشرة : http://bit.ly/2s5mRPP ) – ( الحلقة الحادية عشر : http://bit.ly/2tdLF6X ) – ( الحلقة الثانية عشر : http://bit.ly/2sOubkj )
