حسبان كيجمع في الدعاوي خلى الموظفين والعمال بلا خلاص بلا حولي

عبرو الموظفين والعمال ديال فريق الرجاء على الاستياء ديالهم والغضب من سعيد حسبان، رئيس الرجاء، لخلاهم بلا خلاص، وأزمهم حتى ملقاوش باش اشريو الحولي ديال العيد.
الموظفين والعمال شبعو سبان فحسبان، وبقاو كيدعيو عليه على هاد الحالة لدار فيه، ولزاد مرضهم هو أن حسبان خلص اللاعبين وشي عمال قلال، وخلى الباقي بلا خلاص.
الناس في الرجاء حاسين بالحكرة لدرجة أن شي وحدين فيه بكاو البارح، وبقاو كيغوتو بسباب الوضع الكارثي لديرو حسبان فيهم، وحالف ميخلصهم، وكيتهلى غير فاللعابة، باش العبوا مزيان وديرو النتائج باش ابان هو واعر.
الموظفين عياو اتسناو الأجور ديالهم، وعياو باغين فلوسهم، متخلصوش كثر من أربعة أشهر، وقالو على وعسى فهاد العيد حسبان اتفكرهم ولكن هو خوى بيهم، وخلاهم بلا فلوس بلا حولي.