الرجاء عوتاني راجعين لأكادير بعدما تسد دونور غادي استقبلو الكوكب بأدرار

حصل فريق الرجاء الرياضي على الموافقة ديال السلطات ديال أكادير، والشركة ديال سونارجيس لمكلفا بملعب أكادير ومراكش وطنجة، باش العب المباراة ديالو مع الكوكب المراكشي، برسم الجولة الثالثة من الدوري الاحترافي بملعب أكادير الكبير.
الرجاء لقاو راسهم عوتاني بلا تيران مني سدو ملعب مركب محمد الخامس، باش اتقاد حين غادي العب فيه المنتخب الوطني الماتش ديالو مع المنتخب الغابوني، برسم التصفيات ديال كأس العالم.
الرجاء عياو كيطلبو في السلطات ديال أكادير باش اخليوهم العبو تماك، لأنه ميقدروش العبو مع مراكش في ترانهم فمراكش، وملقاوش تيران آخر فين غادي العبوا، ولكن السطات قالو ليهم حنا نخليوكم تلعبوا ولكن خايفين من الشغب ديال الجمهور.
وبعد أخد ورد وافقوا السلطات باش اسمحو للرجاء العبوا فأكادير، لأنه الفريق قاليهم حنا وافقنا على دونور اتسد لأن الواجب الوطني والمنتخب هو الأول، وعاد قالوا للسطات أن الرجاء لعبوا داك العام في أكادير بزاف الماتشات ومكان لا شغب لا صداع.
الرجاء غادي العبوا في أكادير ولكن الراك غادي العبوا في ملعب مولاي رشيد، لأن حتى هما تيران ديالهم كيتصاوب، والتيران ديال دونور لكانوا معولين عليه حتى هو تسد.