ال الفاسي رجعو لحزب الاستقلال على ظهر ولد الرشيد. عباس الفاسي يقدر يرتاح دابا باش وصل نسيبو

واخيرا رجع حزب الاستقلال لدائرة ال الفاسي. عباس الفاسي حلف حتى يسترجع هاد الحزب بعدما كان متحالف هادي 4 سنين مع حميد شباط الامين العام السابق. ال الفاسي رجعو الحزب ليهم باش يستمرو فالهيمنة على اشهر حزب سياسي فالمغرب. نزار هو نسيب عباس الفاسي. مزوج ببنتو اللي حتى هي استقلالية ومناضلة فالحزب.
عباس هو اللي صايب نزار من النهار الاول. فحكومتو الشهيرة دارو حداه فالشؤون العامة للحكومة. حتى باش وقعو شي مشاكل فبداية العمل ناض عباس نقى الديوان ديالو وجرا على المزعجين ونقد نسيبو من مشكلة كانت غادية تكون كبيرة.
زمن عباس الفاسي كلشي كان كيهدر على شجرة ال الفاسي اللي كانت فالوزارة الاولى فوزارات الصحة =ياسيمنة بادو= والخارجية مع الطيب الفاسي الفهري وفالشؤون العامة مع نزار البركة وفلوطوروت مع الفاسي الفهري لاخر وفالماء والجامعة ديال الكورة والكهرباء مع علي الفاسي الفهري. الناس اعتقدو انه مع شباط الامور غادية تقاد. داز الوقت وحتى حاجة ما تبدلات تقريبا. باقيين ال الفاسي مهيمنين فمراكز القرار فالحزب. الجديد هاد المرة انهم ما قدروش يرجعو للحزب بالاعتماد على القواعد القديمة فقط. القرابة والعائلة٬ بل جابو اللي يقدر يوصلهم ومن الصحرا. حمدي ولد الرشيد منسق الجهات الثلاث فحزب الاستقلال وعضو اللجنة التنفيذية هو اللي وصل نزار البركة. واش غادي يعقل على هاد الشي ولا ال الفاسي غير باش غاديين يتحكمو غاديين يلوحو ال الرشيد كيف ما لاحو قبلو شباط.
الفرق المهم هاد المرة هو حمدي ولد الرشيد وابنو عارفيين مزيان الدرس بالاضافة الى انه الى لعبو معاهم ما غاديش يخسر غير الحزب غادي يخسر المغرب. قوتو فالصحراء كبيرة. كلشي عاقل كيفاش خسر المغرب بعد ما جبدهم فؤاد عالي الهمة وكان معاه الوالي ديك الساعة وهاجمهم في ايامه الاولى فالبام. كانت اكديم ازيك والدولة خسرات بزاف والبام كذلك لكن ال الرشيد حافظو على قواعهم الشعبية، غير طلة على نتائج الانتخابات البلدية والتشريعية تعطيكم صورة.