التعليم كيحتاضن التطرف وكيربي عليه وكيحارب كل اشكال الحب. كيفاش مدير يجري على بنت على قبال بوسة والبنت فالباك ومدارس اخرى فرحانة بمعلمينهم ومعلماتهم كيصليو باطفال فالقسم وكيغلسو عقولهم

هاد القصة ديال طرد تلميذة فالباك بمكناس على قبال بوسة راه اكبر تجلي على ازمة التعليم. راه ماشي ازمة مناهج ووو بل ازمة مدراء ومعلمين كبرو فالكبث وترباو على التطرف بطريقتهم. كيبان ليهم التربية والتعليم بالعقاب. شوهتنا فهاد البلاد غادية تكون كبيرة مع قصة تلميذة باست تلميذ فالقسم وناض استاذ الفيزياء بكل حقارة وكاي مخبر متشبع بالفكر المحافظ مشى كيبلغ. ووصلات القضية لمدير اكثرهم تخلفا وقرر وكأن المدرسة تاع باه يطرد تمليذة فالباك.
واش هاد الشي معقول؟ بوسة عبرات على مشاعر جوج مراهقين يكون نصيبها الطرد ومعلمة كتنشر صورة لاطفال صغار ورجعات قسمها جامع عوض لقراية كيتعلمهم يصليو حتى حد ما يهدر معاها. اش هاد الخراب اللي وصل ليه التعليم.
البنت في فيديو على "شوف تيفي" تحكي قصة القبلة. تحكي تصرف المؤسسة اللي ما عندها علاقة بالتربية. بحال شي حبس لا كلام لا دفاع لا هدرة. اش فيها كاع قبلة. مراهقين بيناتهم امر عادي وحلو تربوي ماشي بالطرد
دابا هاد المد المتطرف اللي هجم على التعليم وهاد الدولة غادية تكون فرحانة بزاف ايلى هاد البنت طردات وكملات حياتها فعالم فشي شكل. المدير غادي يحس بالاعتزاز ياك. تفو على حقارة. كيفاش يكون مربي يتصرف بهاد التصرفات كيفكر غير فالعقوبة القاسية. ايلى خرجو على البنت الخاسر هو البلاد. بنتو تقدر تولي منحرفة. غادية تكبر معقدة من امر انساني عادي هو القبل.
رجعو البنت تقرا وخاص عقوبة فحق هاد المدير لان ما قام به قمة فالتخلف.