الشهادة لخلود اول من قدمات شكاية ضد الصحافي بوعشرين. الشكل فشي شكل والمضمون كيخليك تطرح اسئلة وفصالح المتهم. عبارة: اختارو اي طبيب ونمشي نوريه شهادة العذرية وبوعشرين ما غتاصبنيش” فشي شكل

خلود الجابري اللي دارت اول شكاية ضد الصحافي توفيق بوعشرين٬ مدير نشر “اخبار اليوم” دارت خرجة فيها مقاطع غريبة. السيدة قالت في حوارها مع “شوف تيفي” “اه ما استاجبتش ليه. ماوصلش للي بغى” ثم تضيف “فالمكتب شدني بقوة” “ما اغتاصبنيش انما محاولة اغتصاب”.
خلود قدمات راسها صحافية مشهورة….. قالت باللي سبق ليه وتحرش بيها توفيق بوعشرين وهددها. قالت باللي كانت عندها رسائل الواتساب وطلب منها تحيدهم. قالت باللي شافت صاحبتها كيحرش بيها والغريب فهاد النقطة قالت بللي كانت معاها وعيط لصاحبتها وهي بقات مخبية. ما قالتش فين شافت التحرش واش دار معاها. الغريب هو اللي عندو حرص باش الواتساب ما يبقاوش فيه الرسائل كيفاش يقدر يصور فيديوهات. 50 فيديو كل فيديو فيه اقل 15 دقيقة.
خلود كتقول باللي قدمات شكاية حقاش مارس عليها “نؤكد ليكم انا اللي قدمت شكاية بالموضوع” واتهمته “باستغلال المنصب ديالو باستدراجي لممارسة الجنس مارس علي جميع الضغوطات نحني الراس”. وقالت باللي واجهتو واضافت “بوعشرين باغي خلود واللي فالمكتب كانو عارفين وساكتين”.
فقضايا تقدر تكون فيها المشتكية ضحية اغتصاب. خاصها تعرف دوز ميساجها. خاصها تكون مقنعة. ما يمكنش يكون شي حد متضامن مع متهم بالاغتصاب =واخا شوهتنا كانت عالمية مع شي وحدينات فقضية سعد لمجرد وحتى طارق رمضان= ولكن كنهدر على الانسان السوي. غير شوفو الشهادات اللي قدماتها مغتصبات ضحيات الاغتصاب فاوربا وشهادة خلود. كاين مشكلة فالشكل وفالمضمون. هاد المشكلة كتخلي اسئلة اخرى تطرح.
خرجات باش تقول باللي مازال عزبا ضعفاتها. يمكن موجهاها لعائلتها لمستقبلها فمجتمع بحال المجتمع المغربي ولكن ما كانش عليها تقولها. تركيز “شوف تي في” عليها فالعنوان كيبين باللي هي اللي طلباتها تبان.
خلود دعات جميع لبنات اللي تعرضو للاغتصاب باش يقدمو شكايات ضد بوعشرين. بانت فاخر الفيديو بحال شي قيادية ضد قضية نبيلة وهي مواجهة المغتصبين وفضحهم ومحاكمتهم مرة اخرى الشكل ما كانش عندو علاقة بمضمون هاد الرسالة. كنتكلم على اختيار الكلمات على تقاسيم الوجه على لبلاصة اللي صورات فيها. موضوع ماشي ديال حديقة الجامعة العربية فكازا.
الاغتصاب خاص محاربتو خاص فضح ممارسيه. خاص محاكمة هادوك الذئاب المفترسة. غير فبلاد بحال بلادنا منسوب الثقة ناقص فكلشي. خاص الخرجة تكون مغيزة مقنعة قوية مركزة. 5 دقايق كافية.