شكون يدافع على لبنات فقضية “بوعشرين”: راه ماشي كل وحدة ناشطة خاصها تغتاصب او تتحرش بيها. احدى المشتكيات ل”كود”: هاد حملات التشهير مدمرة وحتى حد ما كيدعمنا لا نفسيا لا قانونيا

قضية توفيق بوعشرين ناشر “اخبار اليوم” المتهم بقضايا خطيرة فيها “الاتجار بالبشر” والاغتصاب” و”التحرش” فيها بزافت الجهات متضررة. كاينة انتفاء “قرينة البراءة” لا مع المتهم الرئيسي بوعشرين لا مع المصرحات من 15 فتاة فيها صحافيات لا المشتكيات اللي وصلو لشي 9 من اصل هاد 15.
كاين خلط كبير خلى كلشي تالف دايخ فالصحافيين. منطقي. كيشوفو قطاع كولو يقدر يتشوه وشوهة كبيرة. بل بدا يتشوه.
دابا كاين مشكل كبير للضحايا اللي قدمو شكايات او صرحو. صورتهم فمحيطهم الصغير دمرات. شي باغي يطلق شي يهدد بالانتحار.
اللي خلى هاد الشي ان لبنات تعرضو لحملة كبيرة ضدهم. خاص يكون الامر واضح. واخا تكون بنت قصايرية ناشطة تحب الحياة تحب الجنس برضاها. تعيش حريتها هادا حقها وما خاصش شي حد يدخل فيه. لكن كاين فرق بين هاد الشي وبين الاغتصاب. الاغتصاب فعل شنيع خاص كلشي يتضامن مع ضحاياه. كاينين شي وحدين كيقولو باللي شكل شي بنات كيساعد على التحرش وما يليه. هادا موقف متخلف بزاف. خاصنا تربية كبيرة. يا متخلفين، واخا تدخل عندك البنت لدارك وتكون بوحدكم. ما من حقوش يغتاصبك او يغصبك على شي فعل.
لبنات المشتكيات او المصرحات كيعيشو اليوم وفق ما اكدته احداهن ل”كود” وضعية نفسية صعبة جدا. اللي فقصهم وفق مصدر “كود” ان حتى شي جمعية ما دعماتهم ما سانداتهم ما عاوناتهم لا قانونيا لا نفسيا.
واضاف المصدر ل”كود” كنتعرضو لحملات التشهير للسبان شكون يحمينا. فين الجمعيات المدافعة على المرأة. هادو حكمو علينا قبل الحكم”.