“كود” ترد على ادعاءات دنيا باطما. انا عمر المزين الصحافي حضرت للحفلة وفاسة قاطعوك فقاعة كتهز الف يالله حضر 230 بشهادة مسؤول فالفندق وتقلقتي وطلع ليك الدم

دنيا باطما حاسة براسها. دارت تخربيقة على صفحتها كتسب فصحافي “كود” بلغة كتشبهها وكتبين مستواها. حنا ما نردوش عليها واخا عندنا باش. غير نقولو ليها باللي انا الصحافي اللي سبيته عمر المزين حضر للحفل. من رأي ليس كمن سمع. ونزيدك فالمقال كاينة صورتي معاك. انا عمر المزين تصورت معاك ومع راجلك. احتراما للعائلة الفنية الكبيرة جدا عائلة باطما. للعربي لمحمد لحميد والدك لرشيد.
الحفل يالالة اللي دار الاحد 25 مارس 2018 بفندق “ماريوت فاس جنان بلاص” كنت فيه وبناء على ما شاهدته وعايشته كتبنا مقال. حنا ما عندناش موقف منك ف”كود” حقاش باش كنتي مازال ما وصلتيش حتى للنهاية فبرنامج “اراب ايدول” كتبنا عليك.
نرجعو للحفلة يا مولات الاسلوب الراقي. التذاكر اللّي تباعت شويا فيهوم أن الحفل مبرج باش يبدا مع 7 و30 دقيقة ديال لعشية. هنا بغيناك تجاوبنا بصراحة علاش هبطتي من الغرفة ديالك حتى ل23 و45 دقيقة تقريبا أي ما يزيد على 4 ديال الساعات. واش زعما بدلو التوقيت او الناس مكانوش او بالضبط. غير شرح لينا الحقيقة اللّي حنا عارفينها. حنا سولنا احد المكلفين بالحراسة ديالك وديال الحفل، اكد لينا تقليقتك.
ماشي غير هادشي نمشيو للقاعة اللّي كتهز 1000 واحد تقريبا.. مصدر مسؤول داخل الفندق أكد ل”كود” أن القاعة كان فيها يالله كثر شوية من 200 وهادشي الرقم براسو تسجل حتى قربتي تمشي بحالك.. وماشي غير هادشي التذاكر اللّي تباعو بزاف هوما ديال الدرجة الثانية اللي كيديرو 800 درهم والدرجة الاولى اللّي ب1200 درهم مخداوهومش الناس بزّاف.
وحنا دبا عارفين ان الجهة المنظمة خسرات فهاد البيعة والشرية. الجمهور ما جاش. شكون المسؤول ما سوقناش. حنا عايننا ناس فاس ما جاوش. وقلنا باللي فحفل مازاكان كان ناجح.
اسلوبك وطريقة كتبتك كتبين باللي “كود” فاقصاك. من حقك يا لالة. غير طيحي الباطل وتسبي راه قادرين نديروها ونفوتوك لهيه.