ها هما كيسيسو قضية بوعشرين. رسالة ديال3 مصرحات لهيومان رايت باش يجريو على المحامي النويضي. الرسالة كلها سياسة وتقول كاتبها بام الياس مدردر باتحاد لشكر وهادا رد المنظمة عليها عبر “كود”

دابا مول فكرة الرسالة البليدة لمنظمة هيومان رايت ووتش رجع محاكمة توفيق بوعشرين مدير نشر “اخبار اليوم” المتابع بقضايا خطيرة بحال الاتجار بالبشر والاغتصاب…. رجعها قضية سياسية بامتياز. كيفاش. الرسالة اللي قالت مشتكيات 3 وهما سارة المرس واسماء حلاوي ونعيمة لحروري ان المحامي والحقوقي عبد العزيز النويضي اللي عيناتو المنظمة الحقوقية الدولية مراقبا لمحاكمة بوعشرين “غير محايد” وطلبات فهاد الرسالة باش يحيدوه كاع ويديرو فبلاصتو “تكليف شخصية حقوقية تتوفر على الموضوعية”.
وبرروا هاد الشي باللي النويضي كان صاحب بوعشرين وباللي طلب من محاميات يترافعو عليه وباللي اتصل بيساريين لانتزاع تصاريح تتاضمن مع بوعشرين. وقالو باللي النويضي عندو علاقة ببنكيران وبالبي جي دي.
يعني الرسالة كلها سياسة. هادو اللي باغيين يخليوا القضية “اغتصاب” و”اتجار بالبشر” رجعوها سياسية. لغتها ديال بام الياس العماري واتحاد ادريس لشكر. فيها عبارات بحال “ذروع الحزب الاعلامية الكبرى” وان الملاحظ “له علاقة بالاسلام السياسي الحاكم” وان بوعشرين “طالب اسلامي فالجامعة مع طلبة الميثاق”. كتعرفو كلشي شكون كيقول هاد الهدرة وشكون كيردد هاد العبارات.
دابا بزافت المشتكيات يالله لقاو 3 يوقعو هاد العجب. وغير للتاريخ راه اللي طلب من هادو يديرو هاد العجب قحمو السياسة
ولكن الاهم اش كتقول هيومان رايت؟ حسب مصدر منها في تصريحه ل”كود” باللي المنظمة ما توصلاتش بالرسالة مصدر “كود” اضاف “باش توصل شي حاجة لينا رسميا غاديين نردو”. اي ان هاد الشي كولو وما رسلوهاش كاع للمنظمة