دابا الدراري مابقاوش كايمشيو لبرا على ود الخبز فحال المغاربة ديال شحال هادي، الخبز موجود هنا ! الخبز و الزبدة و الزيت و آتاي موجودين ! دابا بنادم كايختار يمشي برا على ود الكرامة و جودة الحياة

تسعود من عشرة ديال المغاربة لي عندهم الديبلومات لاجاتهم الفرصة يمشيو على برا ماغايخمموش بزاف و غايهزو قلوعهم و غايعلقو من المغرب.
هادو هوما النتائج ديال الدراسة لي دارت روكريت بوان كوم مع اكثر من الف مشارك.
واش محتاجين للاحصائيات باش نعرفو هادشي ؟ طبعا لا ! نزل غير للزنقة و سول شكون بغا يصبح غدا فكندا و لا فرانسا و لا ميريكان و غاتلقا الزنقة كاملة هازة يديها، و لكن هاد الاحصائيات تايخلعو ! بصح كايخلعو لجوج اسباب رئيسية
عرفتي شنو هي تسعين فلميا ديال الناس لي عندهم الديبلومات باغين يمشيو لبرا ، راه ماخلاو لهادوك لي ماعندهم تا ديبلوم و لي ماقارينش مايقولو ،
شحال هادي المغربي كان يكفي يكون عندو غير شي مدخول بسيط باش مايبغيش يمشي لبرا واخا تجيه فرصة ! اما لاكان عندو ” الوظيف” ديك الساعة راه واخا طلب و تزاوگ‌ فيه مايمشيش ليك ، كايقوليك علاش آ خويا ؟ غانسمح فوظيفتي و بلادي و داري و العائلة و نمشي نتغرب فبلادات الناس. شخصيا الوالد ديالي مشا للفرانسا و سبانيا و تسارا فبزاف ديال الدول الأوروبية و رجع للمغرب، فاش كانسولو كانقوليه علاش ماجلستيش فشي دولة من هادوك ياك عجبوك ؟ قاليا كان كايصحابنا المغرب غايولي شي حاجة …
شحال هادي المغاربة كان عندهم أمل فالبلاد، أمل فأنه لاخدم هنا و كان عندو باش يعيش باراكا عليه حامد الله و شاكرو ! و كايمشي لبرا غير هاداك لي بصح تسدو فوجهو البيبان و لا خدمة لا ردمة ! و مزلوط واصلة فيه للجذز ! كايمشي يقلب على الخبز عند ” النصارى” !
دابا الدراري مابقاوش كايمشيو لبرا على ود الخبز، الخبز موجود هنا ! الخبز و الزبدة و الزيت و آتاي و الكومير موجودين ! دابا بنادم كايختار يمشي برا على ود الكرامة و جودة الحياة لي كاتضمنها برا، شنو هي هاد جودة الحياة، لاكاليطي د في ؟ هي تعرف بلي لامرضتي ماغاتلاحش فالسبيطار كي الكلب، هي لاولدتي الولاد غايلقاو المدرسة فين يقراو و غايلقاو ليزاكتيفيطي لي يديرو و يعمرو بيهم اوقات الفراغ عوض يبقاو جالسين حداك شادين الطابليط و مكونيكطين كي الحمير ! جودة الحياة هي تعيش فدولة نقية ! لا كنتي مرا تقدري تهزي شي سربيتة و طيرموس و تمشي تجبدي فشي جردة نهار الاحد الصباح و تشمشي مع راساتك بلا مايجي يتجبد حداك شي مسخوط الواليدين و يبرزطك ! جودة الحياة هي تعيش و تخلص الضرائب و تحس براسك كاتستافد بالمقابل من مصالح عمومية بجودة مزيانة ! ماشي طبقة متوسطة كاتاكل العصى على قلبك ! تخدم و تردم و تحيد ليك الدولة اكثر من ثلاتين فلميا ديال الصالير ديالك و نهار تمرض تمشي الكلينيك يگريسيوك فزبالة د الفلوس و نهار ولدك يبغي يقرا دخلو لمدرسة خاصة تاهوما يگريسيوك فزبالة د الفلوس ! برا كاتخلص الضرائب و كاتستافد من الخدمات العمومية و هنا كاتخلص الضرائب و كايزيدو يضربو مك تاتنقز ! ماكاين لا خدمات عمومية لاتاخرية ! الزنقة ماتقدرش دوز منها مورا التسعود فشي احياء ! آشمن طبقة متوسطة و لا النم ؟
ايه مابقاش غير المزلوط المقودة عليه الشومور لي كايقلب على برا، حتى لي مرتاح ماديا باغي برا ! حتى المهندس و الكوميرسيال و الطبيب و الاطار العالي باغي يمشي لبرا… علاش؟ حيت ليس بالخبز وحده يحيى الانسان فالفين و تمنطاش ! الناس كاتهرب باش يعيشو حياة احسن و يعطيو لولادهم و تريكتهم مستقبل افضل !
كاينين ناس مرتاحين ماديا فالمغرب ! او ناس عندهم لابوسيبيليتي يكونو مرتاحين ماديا فالمغرب و ماباغينش يجلسو فيه ! شوف شحال من طالب ديال الهندسة كايمشي يقرا و كايجلس فباريس ! شحال من طالب كايمشي يقرا و كايجلس فتولوز ! و لي كايرجع كاتلقاه غير حيت مالقاش خدمة برا أما لي كايلقاها اغلب الاوقات ماكايفكرش جوج ديال المرات باش يختار يجلس و يستقر لهيه و يدير كاريير !
هادي راها مشكلة كبيرة ! باش يكونو الاغلبية د الناس لي جالسين فهاد البلاد حتى هادوك لي سوا ديزون مرتاحين و مستقبلهم مضمون جالسين فالبلاد غير حيت ماعندهمش بديل عليها و كايساينو غير الفرصة باش يعلقو ! مشكلة كبيرة حيت لي كايساين غير الفرصة باش يعلق ماعمرك تعول عليه يبني شي حاجة فالبلاد فالامد البعيد.
اليائس ماكايبنيش ! اليائس ماكايعطيش ! ماكاينتجش و ماكايفكرش ! و ماكايستثمرش مجهودو فالبلاد حيت حاط الضوسي ديال الهجرة و حيت حاضي المناسبة باش يعلق.
هادشي علاش هاد الدراسة صراحة كاتبان ليا خطيرة ! و كاضرب فگاع ديك الهضرة ديال ” خلق مناصب الشغل” ” تشبيب القطاعات” ” تشجيع المقاولة” …و ديك الهضرة لي كاتكتب فالباور بونت و كاتعرض فدوك الندوات لي كايدارو فلوطيلات الكبار.
حيت اهم الحاجة لي هي “الامل” مفقودة فالمعادلة.