بمناسبة فيزا قطر واش كاينة ولا ماكايناش كايبقا السؤال: الهربة وين؟

—
هادي شي ايام و حنا كنسمعو راه دولة قطر حيدات الفيزا للمغاربة. الناس فرحو و ابتهجو، و شي تيقولها لشي.. فُكَّ الكرب و حَلَّ الفرج..
المغاربة خاصهم غير يسمعو شي خبر بحال هذا باش يبداو فجميع الحوايج و يتوادعو مع الجيران و يمشيو يتسلفو فلوس البِيي ديال الطيارة..
قالو ليهم اودي راه ماشي الفيزا ديال الخدمة اللي مطلوقة راه غير فيزا توريستيك..والو بنادم بغى يمشي لقطر و ربي كريم..ليوم كتقرا فالصحف ان الخبر لا اساس له من الصحة و ان السلطات القطرية قامت فقط ببعض التسهيلات لواحد الفئة معينة فطلب التاشيرة. مثلا الناس الي عندهم فيزا او اقامة فدول شنغن (اوربا) او حق البقاء 96 ساعة للناس العابرة لدولة اخرى..و فعلا قطر حيدات الفيزا لشحال من دولة و لكن راه ماشي المغرب علامن داوية.
هاد قطر الي عليها النفاذ راه مزيانا غير لمّاليها.
ماشي من السهل تكون مهاجر في قطر حيث ظروف العمل غالبا ما تكون غير إنسانية.
عندهم حوالي 1.2 مليون عامل أجنبي – معظمهم من الفقراء من الهند وباكستان وبنغالديش ونيبال وإندونيسيا والفلبين – و كتشكل 94٪ من القوى العاملة في قطر.
هوما على هاذ النظام من الخمسينيات ، كاع دول الخليج الي ناقصة فيها الكثافة السكانية كان كيخصها الي يخدم في قطاعي النفط والغاز. وهادشي باقي حتال دابا سورتو مع غايدار فيها كاس العالم ف2022 و محرك عندها البني، التيرانات و الاوطيلات..
في التقارير ديال المنظمة العالمية لحقوق الانسان هيومن رايتس ووتش قارنات شروط العمل فيها بالعمل الإجباري في القرون الوسطى.
ميمكنش للعامل يبدل الخدمة ولا يمشي لشي دولة اخرى، يشد البيرمي، يكري دار، يحل كونت فالبانكا بلا إذن من كفيله. الاستغلال التام.
هادشي مكيخصس غير اليد العاملة حتى المهندسين و الأطر، كيلزمهم كفيل، و ما عندهم حتى شي تامين على العمل او تعويض فحالة الطرد، و حتى شرط مكيمنع الشركة او رب العمل من الطرد التعسفي.
هادشي من غير المعيشة الي غالية و الظروف المناخية القاسية الموت ديال الصهد.
و المغربي راه عندو الحق يمشي ل 55 دولة بلا فيزا ولا كتعطالو عند الوصول. من بين هاد الدول كتلقى كوريا الجنوبية، المالديف ، السايشيل..غير الي مابغى يفوج.