كانعقل فاش كنت كانقرا فالسنة الثانية فالكوليج كانت عندنا واحد الاستاذة كاتسولنا واش كاتبغيو الله ؟ كانجاوبوها نعم آ استاذة ! كاترد علينا ! لا ! ماكاتبغيوش الله ! حيت كون كنتو كاتبغيو الله كون سترتو راسكم و درتو الحجاب لي الله امركم به.‎

الدواعش و اللحايا ماخطاو تا قطاع فالمغرب ! و الخدمة لي دخلتي ليها كاتلقاهم حاضرين بقوة عدا بعض القطاعات الخاصة المحسوبة على رؤوس الاطابع لي مازال الفكر الداعشي مانشرش فيها باقلو
و لكن كايبقا التعليم من القطاعات لي عامرة بعرام ديال الدواعش و الداعشيات !
كانعقل فاش كنت كانقرا فالسنة الثانية فالكوليج كانت عندنا واحد الاستاذة كاتسولنا واش كاتبغيو الله ؟
كانجاوبوها نعم آ استاذة !
كاترد علينا ! لا ! ماكاتبغيوش الله ! حيت كون كنتو كاتبغيو الله كون سترتو راسكم و درتو الحجاب لي الله امركم به. شوف الابتزاز العاطفي كي داير !
هاد الاستاذة نهار ميريكان غزات العراق د صدام حسين دارت مندبة فالقسم و دوزات الحصة كلها كاتبكي و طبعا ماقراتناش داك النهار حيت كانت حازنة على خوتنا فالعراق !
ماقراتناش ! و تخلصات على داك النهار لي دوزاتو فالبكا و النحيط !
شوف الضمير المهني كي داير !
نفس الاستاذة كانت كاتاخد لينا وقت من المقرر كل حصة باش نعرضو فيه سورة الملك جماعة ! واخا ماعندناش فالمقرر ! و لكن لا ! كانت فارضة علينا نحفضو سورة الملك و نقراوها فبداية اي حصة.
استاذ آخر ديال التربية الاسلامية هاد المرة فالليسي كان كايقولينا ” انه الكفار ! الالمان و الفرنسيين و گاع الاوروبيين سبحان الله لاشفتي فوجهم مزيان غاتلقا مافيهش الدم حيت كاياكلو الحلوف و العياذ بالله”
استاذ آخر تاهوا فالليسي كان كايقولينا فاش كايهضر على العالم ابن سينا لي السبيطار مسمي على سميتو ” ابن سينا الحشاش” ….
هادو غير شوية من الامثلة لي عقلت عليهم و لي كانو بشكل او بآخر عن قصد او عن غير قصد كايزرعو فينا بذرة الفكر الداعشي و كايستغلو سذاجتنا باش يطوعونا كيما بغاو ! بلا مانهضر على اول درس كان كايكون عندنا فالمقرر ديال الابتدائي ” التفتح الفني” يا حسرة و لي غايعقلو عليه گاع ولاد التسعينات ديال ” ارسم الكفار ! ارسم المسلمين”
قطاع التعليم من القطاعات المخونجة بشكل مهول و مخيف و هادشي علاش ماتفاجئتش البارح فاش شفت تدوينة داك الاستاذ الداعشي ردا على الفيديو ديال الاعتداء على سيدة و راجل تاهموهم بعض الرعاع بأنه كايمارسو الجنس فنهار رمضان و تكرفصو عليهم و رعفو السيدة ! و جا سي الاستاذ قالك بلي ماكانش عليهم يضربوهم بالهراوات كان عليهم يرجموهم باش يكون العقاب شرعي و لله الحمد.
فحال هاد الاستاذ كايشكلو فئة كبيرة من الاساتذة و المعلمين لي معمرين المدارس العمومية اليوم ! كايكون بعرور تلميذ متوسط فكلشي غالبا متوسط الذكاء و متوسط الجمال و متوسط التفكير تا الخرا متوسط فيه كايوصل تال الدين و كايتشدد ! كاياخد الباك كايمشي يتخشى فلافاك واحد ثلت سنين و لا خمسة كايربي فيهم شي لحية منتوفة تقول نايضة بشعر الط××××ن ، كايعرف فدوك السنوات غير “الصوحبا الصالحاا” و الحرف و التكفات و من بعد كايدفع للكونكور ديال التعليم و كايولي استاذ بين يديه المصير ديال آلاف التلاميذ واجدين طريين ! يشارجيهم باش مابغا ديك الساعة!
شحال هادي كنتي كادخل لمؤسسة تعليمية كاتلقا الاستاذات قمة الاناقة ! ارفع الجلالب و ارفع الصايات و ارفع الروايح ! كاتبان ليك الاستاذة فحال شي وردة گاع البنيات كايبغيو يكونو فحالها !
دابا كادخل للمؤسسة التعليمية ماكاتعرفش الاستاذة من لافام د ميناج ! حيت بجوجهم مكرفصات و بجوهم مخشيات وسط الدرابل و بجوجهم هاملات ريوسهم.
لا و الطوب هوا هاد الاهمال بقوة ماولا هوا القاعدة فالمؤسسات العمومية اي استاذة خارجة عن هاد القاعدة كاتولي تبان فحال شي ايكسطغاطيغيسطر ! خصوصا لاكانت شابة ! و كايولي مفروض عليها تتدربل فحال الاخرينات حيت ماكايخرج من الجماعة الا الشيطان.
و ها لي باغي يفرق البنات على الاولاد
ها المعقدة لي باغا تلبس البنات على ذوقها
انواع و اشكال التزمت و العقد
وسط غياب تام للانشطة الموازية فحال المسرح و الغناء و الرسم و الفن لي يمكن يرفهو على التلاميذ و يحلو ليهم عينيهم على الجمال و الحياة.
خلات على المدرسة العمومية و على خربوها الخوانجية و الدواعش لي كايستغلو طراوة الشباب و الاطفال فيها باش يمررو ليهم افكارهم الاقصائية الظلامية الهدامة ! راه خاص شي ورش لاصلاح التعليم و يكونو داخلين فيه هاد الناس هادو حيت وي التعليم مريض من بزاف ديال الجهات و لكن راه حتى هاد الدواعش لي مخشيين مع الاطفال و الشباب تمنية د السوايع فالنهار طيط ا طيط خاص لي ينوض لدينمهم.