الحقيقة. ها علاش كريستيانو رونالدو مشا لليوفنتوس ووقتاش خدا القرار

ذكر موقع “يوروسبورت عربي” أن قصة رحيل كريستيانو رونالدو من ريال مدريد الي لعب معاه 9 مواسم بدات يوم 13 غشت الماضي، وبالضبط في لقاء ريال مدريد وبرشلونة في كأس السوبر الإسباني والي ربح فيها ريال مدريد بثلاثية مقابل هدف وتطرد كريستيانو من اللقاء، وتوقف بسببها لربعة ديال الماتشات.
وحسب نفس الموقع، تزاد الضغط على رونالدو مع فشلو في التسجيل لأكثر من ماتش وفاش كريم بنزيما وغاريث بيل، حتى هما ماسجلوش. وكان أول هدف للبرتغالي أمام خيتافي في الدوري الإسباني، وغاب من بعدها 6 ماتشات على التسجيل قبل مايماركي على ملقا.
ورونالدو كان عارف شنو كيتسناه فالسنوات الأخيرة مع الريال، وهو كان ديما كيوجه رسائل لجماهير “سانتياغو برنابيو” بالوقوف الى جانب اللاعبين ومايطلقوش صافرات الاستهجان كيف وقع بزاف ديال المرات مع بنزيما في الموسم الي فات.
وانطلاقا من هنا، بدا رونالدو كيفكر جديا يمشي من ريال مدريد، هو دابا عندو 33 عام اي أنه وصل للمرحلة الأخيرة من مسيرتو قبل الاعتزال، واللعب الي قدم مع ريال مدريد في هاد 9 سنوات صعيب يتعاود، وحيت الجماهير مكترحمش فخيار الرحيل فهاذ الوقت هو الأفضل للاعب وللفريق.
واختار رونالدو يوفنتوس وماشي مانشستر، حيت كيعجبوه التحديات وايضا لاسباب أخرى منها أن علاقتو بمدرب الفريق جوزيه مورينيو غير الجيدة، وكثرة النجوم فالدوري الإنجليزي الي كتعني أن رونالدو ماغيكونش “النجم الأول”، وخاف مايكونش قادر يعاود ما فعله مع مانشستر قبل.